Ռուսական Russia Today լրատվամիջոցի ղեկավար Մարգարիտա Սիմոնյանի մուտքը Հայաստան արգելվել է, Տելեգրամի իր ալիքում երեկ հայտնել է Սիմոնյանը՝ անդրադառնալով Ռուսաստանի Դաշնության Պետդումայի ԱՊՀ հարցերով հանձնաժողովի առաջին փոխնախագահ Կոնստանտին Զատուլինի այցի արգելքին։

Սիմոնյանը, սակայն, այլ մանրամասներ չի ներկայացրել, թե ինչպե՞ս է տեղեկացել այդ մասին։

Փոխարենը, Հայաստանի Ազգային ժողովի խոսնակ Ալեն Սիմոնյանը չի բացառել, որ Զատուլինիից բացի՝ այլ «արգելվողներ» կան, այդ թվում՝ Սիմոնյանը:

Արձանագրենք, որ այս պահին պաշտոնապես հաստատված է միայն Զատուլինի հետ կապված տեղեկատվությունը, այն էլ՝ Հայաստանյան իշխանությունները դեռ չեն պարզաբանել՝ Զատուլինի այցն է անցանկալի, թե նա համարվում է անցանկալի անձ։

Եթե Հայաստանի իշխանությունները սահմանափակվեին միայն Զատուլինի դրվագով, դեռ կարելի էր, իհարկե՝ մեծ վերապահումներով, պնդել, որ գործ ունենք մասնավոր դրվագի հետ՝ դա չտարածելով հայ- ռուսական հարաբերությունների վրա:

Օրինակ, իշխանությունը կարող էր վկայակոչել Զատուլինի վերջին հարցազրույցն ու իր վրդովմունքը կամ հիշատակել Ռուսաստանի պատգամավորի ու Ռոբերտ Քոչարյանի մտերմությունը ու այդ հիմքով՝ Զատուլինի հնարավոր միջամտությունը Հայաստանի ներքաղաքական կյանքին ու այդպես շարունակ:

Բայց գործ ունենք այլ պատկերի հետ:

Իշխանությունն ինքն է Զատուլինի դեպքն ընդհանրացնում ու նպաստում հակառուսական տրամադրությունների գեներացիայի:

Հայաստանը սահմանափակ ռեսուրսներ ունեցող երկիր է, որի դիվանագիտության հիմքում պետք է դրված լինի արտաքին քաղաքական հնարավորությունների մեծացման իմպերատիվը: 

Բայց Փաշինյանը իռացիոնալ մոտեցումների կրող է:

Իր իշխանության արշալույսին նա Պուտինին սիրաշահելու խնդիր ուներ, սակայն այդ նպատակով ոչ թե նոր բովանդակություն էր հաղորդում հայ- ռուսական հարաբերություններին, այլ ԵՄ պաշտոնյաներին անվանում էր «եվրոյոնջա»: Նման մոտեցումը ավելի սերտ չդարձրեցին հայ- ռուսական հարաբերությունները, բայց Հայաստանը դրեցին միակողմանի կախվածության մեջ՝ շրջափակման մեջ դնելով մեր արտաքին քաղաքականության հնարավորությունները:

Դրա հետևանքները մենք տեսանք 44-օրյա պատերազմի ընթացքում:

Հիմա Փաշինյանն ինքնամոռաց նետվել է Արևմուտքի գիրկը, բայց դարձյալ շեշտը դրվում է ոչ թե Հայաստան- Արևմուտք խիստ կարևոր հարաբերությունների բովանդակության, այլ շատ էժան, կենցաղային ռուսաֆոբիայի վրա:

Վստահաբար, այս նարատիվով Արևմուտքում հաջողություններ չենք ունենա, բայց լուրջ ռիսկեր կարող ենք սպասել հյուսիսից:

Փաշինյանը թշնամիներ վաստակելու վարպետ է...

Վահրամ Բագրատյան