Sensor միջազգային երաժշտական փառատոնը չի չեղարկվելու․ այն անցկացվելու է Հայաստանի Պարիս Հերունու աստղադիտակի տարածքում։ Այս մասին այսօր MediaHub.am-ը տեղեկացավ փառատոնի կազմակերպչական թիմից։
Հիշեցնենք, որ ավելի վաղ հայտնի էր դարձել, որ սեպտեմբերի 10-12-ը Հայաստանում` Օրգովում գտնվող Պարիս Հերունու աստղադիտարանի տարածքում կանցկացվի Sensor երաժշտության և ժամանակակից արվեստի միջազգային փառատոնը։
Մեր ճշտող հարցին, թե աստղադիտարանի տարածքում բեմն արդեն պատրա՞ստ է, պատասխանեցին՝
«Այս պահին մաքրում և վերականգնում ենք տարածքը և այնտեղ գտնվող ենթակառուցվածքները։ Երաժշտական բեմերը գտնվելու են աստղադիտակի հարակից տարածքում, ոչ թե ներսում։ Փառատոնի շրջանակում մենք ապահովելու ենք անվտանգության բոլոր նորմերը ինչպես փառատոնի մասնակիցների, այնպես էլ գիտական կենտրոնի ենթակառուցվածքների ու բոլոր օբյեկտների համար»։
Նշենք, որ «ՍԵՆՍՈՐ» միջազգային փառատոնի կազմակերպման և անցկացման նպատակով «Ստանդարտացման և չափագիտության ազգային մարմին» ՓԲ ընկերության և «Արմատ քոմմյունիթի ժամանակակից արվեստ» հասարակական կազմակերպության միջև կնքվել է թույլտվության պայմանագիր, համաձայն որի՝ «Արմատ քոմմյունիթի ժամանակակից արվեստ» հասարակական կազմակերպությունն իրավունք է ստանում 2022թ.-ի սեպտեմբերի 5-ից 15-ն ընկած ժամանակահատվածում ժամանակավոր, անհատույց տիրապետել և օգտագործել «Ստանդարտացման և չափագիտության ազգային մարմին» ՓԲ ընկերությանը սեփականության իրավունքով պատկանող Արագածի գիտական կենտրոնի անշարժ գույքի որոշակի մասը։
«Պայմանագրով հստակ ամրագրված է, որ արգելվում է փառատոնի մասնակիցներին և «Արմատ քոմմյունիթի ժամանակակից արվեստ» հասարակական կազմակերպության աշխատակիցներին մտնել կամ օգտագործել այն տարածքները, որոնք չեն ներառված միջոցառման անցկացման համար դիտարկված հատակագծի մեջ՝ մասնավորապես ՌՕԴ-54/2.6 ռադիոաստղադիտակի և նրան հարող հարավային թունելի հատվածը, ինչպես նաև՝ ազգային չափանմուշների համար նախատեսված շինությունները» (մեջբերման ավարտը)»,-ասաց նա։
Նշենք նաև, որ ըստ «Ստանդարտացման և չափագիտության ազգային մարմնի» հայտարարության՝ ընկերությունը ողջունում է տուրիզմի զարգացմանը նպաստող ցանկացած ողջամիտ գաղափար, ինչի արդյունքում Հայաստանն իր պատմամշակութային և գիտական պոտենցիալով կարող է լավագույնս ներկայանալ աշխարհին։
Լիաննա Թորոսյան