«Ժողովուրդ» օրաթերթը գրում է․
ՔՊ խմբակցությունը, ԱԺ նստաշրջանի մեկնարկին ընդառաջ, երեկ փակ հանդիպում է արել ԱԺ-ում: «Ժողովուրդ» օրաթերթը տեղեկացավ, որ քննարկումը բավականին կարճ է տեւել՝ մոտ 1 ժամ: Ինչպես մեր աղբյուրները հայտնեցին, պասիվ հանդիպում է եղել, արտառոց միջադեպեր չեն գրանցվել, նաեւ մասնակիցներն են քիչ եղել: ՔՊ-ականները հիմնականում պատրաստվել են այսօրվա ԱԺ նիստին, որոշել են քվեարկությունների հարցը, ով ինչ է խոսելու, ինչի վերաբերյալ է ելույթ ունենալու հիմնականում եւ այլն: Տեղեկացանք նաեւ, որ իշխանականները տրամադրված են այս նստաշրջանը հանգիստ «անցկացնել», սուր չքննադատել ընդդիմադիրներին:
Թեեւ հերթական քառօրյայի օրակարգում 19 հարց է ընդգրկվել, սակայն իշխող ֆրակցիայի համար կարեւոր է անցկացնել հատկապես «Պետական գաղտնիքի մասին» օրենքը, ուստի որոշել են միաձայն կողմ քվեարկել նախագծին: Տեղեկացանք, որ ընդդիմությունն էլ պատրասվում է այս նախագծի հետ կապված «թեժ» քննարկում այսօր ծավալել ԱԺ-ում եւ մանրամասն ներկայացնել դրա խնդրահարույց կողմերը: Այս առումով ակտիվ է լինելու հատկապես Արծվիկ Մինասյանը, որն այսօր ընդդիմության անունից ներկայացնելու է միասնական տեսակետ՝ տվյալ նախագծի վերաբերյալ:
«Ժողովուրդ» օրաթերթը տեղեկացավ, որ իշխող ֆրակցիան երեկվա փակ նիստում քննարկել է նաեւ ՄԻՊ թեկնածուի հարցը, սակայն այդպես էլ վերջնական որոշման չի եկել, պատգամավորներից մի քանիսն իրենց թեկնածուների անուններն են տվել, սակայն որեւէ թեկնածուի շուրջ խմբակցությունը կոնսենսուսի չի եկել:
«Ժողովուրդ» օրաթերթը գրում է․
2018 թվականի սեպտեմբերի 11-ին հրավիրված մամուլի ասուլիսի ընթացքում ՀՀ ՀՔԾ, ներկայումս Հակակոռուպցիոն կոմիտեի ղեկավար Սասուն Խաչատրյանը հրապարակավ հայտարարեց, որ 2008 թվականի մարտի 1-ին սպանված Տիգրան Աբգարյանի սպանությունը բացահայտված է, եւ շուտով բոլորը կիմանան այդ մասին: «Տիգրան Աբգարյանը սպանվել է այն ժամանակ, երբ արդեն իսկ մտցրել էր Քոչարյանն արտակարգ դրություն, սակայն որեւէ հրազենային վիրավորում ստացած զինծառայող չկար։
Եվ մեր տարբերակը, որը հետեւյալն էր, որ Տիգրան Աբգարյանին հրազենային վիրավորում է հասցվել նրա համար, որպեսզի Ռոբերտ Քոչարյանի այդ խոսքերը, թե՝ «մենք արդեն ունենք զոհեր», հիմնավորվեն։ Դա նախաքննությամբ հիմնավորվել է»։ Անցել է մոտ 5 տարի, սակայն 2008 թվականի մարտի 1-ի օրը Երեւանի կենտրոնում սպանված 10 քաղաքացիների սպանությունները այդպես էլ չեն բացահայտվել: Նիկոլ Փաշինյանը մոտ 5 տարի է՝ զբաղեցնում է ՀՀ վարչապետի պաշտոնը, նշանակման օրվանից հայտարարում էր, որ «Մարտի 1»-ը բացահայտվելու է, սակայն 5 տարի անց 10 մարդկանց սպանությունները չեն բացահայտվել:
Չկա որեւէ պատիժ որեւէ մեկի նկատմամբ, միայն փորձ արվեց Ռոբերտ Քոչարյանին եւ մի քանի թիմակիցների վրա մեղադրանքներ հարուցել, սակայն բոլորը հերթով կոտրվեցին, ու, կարելի է ասել, Նիկոլ Փաշինյանը մաքրագործեց Ռոբերտ Քոչարյանին՝ նրան վերջնականապես մաքրելով «Մարտի 1»-ի թեմայից: Փոխարենը Նիկոլ Փաշինյանի իշխանության օրոք որոշվել է մարտի 1-ին նվիրված հուշարձան տեղադրել Երեւանի քաղաքապետարանի հարակից հատվածում: Ստացվում է, որ Նիկոլ Փաշինյանը իշխանության եկավ, որպեսզի բացահայտի մարտի 1-ի ողբերգական օրը, սակայն հիմա բավարարվում է հուշարձան դնելով:
Հիշեցնենք նաեւ, որ Լենա Նազարյանը մարտի 1-ի ողբերգության զոհերին փոխհատուցում տալու մասին շտապ նախագիծ ներկայացրեց, սակայն հիմա մոռացել է պահանջատիրությունը ու մի անգամ նույնիսկ չի հետաքրքրվել հրապարակավ՝ ինչու չբացահայտվեց «Մարտի 1»-ը, եւ ինչու Նիկոլ Փաշինյանը խաբեց բոլորիս:
«Փաստ» օրաթերթը գրում է
Հատկապես աղետալի պատերազմից հետո մեր հասարակության զգալի մասը վստահ էր, որ Նիկոլ Փաշինյանն ու իր թիմը պետք է հեռանան: Սակայն առ այսօր նրանք շարունակում են պայքարել: Տարբեր անհատներ ու քաղաքական ուժեր, գործիչներ տարբեր պատկերացումներ ունեն, թե ինչ տարբերակով է հնարավոր հասնել իշխանափոխության, և արդյոք Փաշինյանը դեռ երկար կկարողանա պահել իր իշխանությունը։ «Միասնություն» շարժման ղեկավար Արման Վարդանյանը կարծում է, որ կա երկու սցենար, որոնք կարող են խանգարել նրան երկար մնալ իշխանության ղեկին։ Առաջին սցենարը, ըստ «Փաստի» զրուցակցի, նոր ինստիտուցիոնալ հասարակական-քաղաքական հարթակի ձևավորումն է, որը կհամախմբի նոր մտածելակերպով, ազգային, բարոյական ու հոգևոր արժեքներով օժտված, բավարար խելացի և անսասան ոգի ունեցող մարդկանց՝ ստանձնելու պետության կառավարման պատասխանատվությունը։
«Այս պահին սա Հայաստանի հասարակական-քաղաքական կյանքում ամենապահանջված օրակարգն է և մեր ժողովրդի գլխավոր ուղերձներից մեկը։ Սա չի նշանակում, որ այն առողջ, անաչառ ուժերը, որոնք փոքրամասնություն են կազմում, բայց դեռ փորձում են պայքարել մեր պետության համար, չեն կարողանա միանալ նոր հարթակին»,-ասում է նա և հավելում, որ երկրորդ սցենարը հեղափոխությունն է՝ այս անգամ կոշտ և անկանխատեսելի։ «Բացի այդ, մենք չգիտենք, թե ինչ ուժեր կկարողանան այդ էներգիան ուղղորդել, բայց, ամենայն հավանականությամբ, դրանք կլինեն արևմտամետ շարժումներ, քանի որ նրանք ունեն հեղափոխական տեխնոլոգիաների մեծ փորձ և ժամանակին կարողացել են գրեթե «սանձահարել» նմանատիպ իրավիճակ Հայաստանում»,-մեզ հետ զրույցում նշեց Արման Վարդանյանը՝ հավելելով, որ երկրորդ ճանապարհի կողմնակից չէ և վստահ է, որ «Շարպյան» (գունավոր) հեղափոխությունները միայն խարխլում են պետության հիմքերը և տանում տարածքային կորուստների։
Վարդանյանի համոզմամբ, իր նշած հասարակական-քաղաքական հարթակի առաջին պլանում պետք է լինեն այն քաղաքական ու հասարակական գործիչները, որոնք ունեն հստակ պետական մտածողություն, և այդ մտածողությունն ուղղված է մեր պետության անվտանգության և բարգավաճման ամրապնդմանը, նրանք, ովքեր կարող են որոշել «խաղի կանոնները», հուսալի գործընկեր լինել ռազմավարական դաշնակիցների համար և «հասկանալի խաղացող»՝ քաղաքակիրթ աշխարհի համար: «Պետք է լինեն այն լիդերները, ովքեր յուրաքանչյուրն իր ոլորտում ապացուցեցին, որ հաջողակ են, սկզբունքային և չեն վախենում որոշումներ, այդ թվում՝ «ցավոտ» որոշումներ կայացնելուց։ Սա Հայաստանին այս ծանր վիճակից դուրս բերելու միակ ճանապարհն է»,-ասաց մեր զրուցակիցը:
«Փաստ» օրաթերթը գրում է
Երեկ հայտնի դարձավ, որ Ռուսաստանի արտգործնախարար Սերգեյ Լավրովը երկօրյա այցով մեկնել է Բաքու: Ինչպես նախապես նշել էր ՌԴ ԱԳՆ պաշտոնական ներկայացուցիչ Մարիա Զախարովան, «հատուկ ուշադրություն կդարձվի Ռուսաստանի, Հայաստանի և Ադրբեջանի ղեկավարների եռակողմ համաձայնագրերին»:
«Փաստ» թերթի տեղեկություններով, Լավրովի այցից հետո բացվելու է Բերձորի միջանցքը, առավել ևս, որ Ալիևի կողմից առաջ քաշված հիմնական «խանգարող հանգամանքներից» մեկը վերացված է՝ պետնախարարի պաշտոնից ազատվել է Ռուբեն Վարդանյանը։ Ինչ վերաբերում է վերջինիս, ապա մեր աղբյուրները փոխանցում են, որ նա նեղ շրջապատում և իր թիմակիցների հետ զրույցների ժամանակ ոչ մեկ անգամ նշել է, որ եթե ադրբեջանցիները ճանապարհը բացեն, ապա այն հույսով ու ակնկալիքով, որ, հաշվի առնելով երկու ամսից ավելի Արցախում ստեղծված ծանր իրավիճակը, շատ արցախցիներ լքելու են հանրապետությունը։
Վարդանյանը նաև ընդգծել է, որ ինքը չի պատրաստվում թողնել Արցախը, ավելին, առաջիկայում իր հիմնադրամի միջոցով նախատեսում է նոր ծրագրեր իրականացնել, ներդրումներ կատարել, որպեսզի արցախցիները ոչ միայն չհեռանան, այլև ավելի կառչած մնան իրենց հայրենի հողին։
«Ժողովուրդ» օրաթերթը գրում է․ «Ժողովուրդ» օրաթերթի տեղեկությունների համաձայն՝ քաղաքական իշխանությունը ի սկզբանե ներքին որոշում է ունեցել՝ ե՛ւ դատավոր Զարուհի Նախշքարյանի, ե՛ւ դատավորների միության փոխնախագահ, դատավոր Արթուր Ստեփանյանի լիազորությունները դադարեցնելու մասով:
«Ժողովուրդ» օրաթերթին տեղեկություններ հասան, որ ԲԴԽ նախագահ Կարեն Անդրեասյանը իր նեղ թիմի մոտ անկեղծացել է, թե նպատակ չունի Արթուր Ստեփանյանի լիազորությունները դադարեցնել: Մեզ հասած բացառիկ տեղեկությունների համաձայն՝ Կարեն Անդրեասյանն, իհարկե, ուղիղ խոսք չի տվել որեւէ բան Ստեփանյանի կողմնակիցներին, սակայն ինչպես նկատում ենք, նրա զանգ-նամակ-խնդրանքը տեղ է հասել:
Երեկ Բարձրագույն դատական խորհուրդը դադարեցրեց Երեւան քաղաքի դատավոր Զարուհի Նախշքարյանի լիազորությունները, իսկ Դատավորների միության փոխնախագահ Արթուր Ստեփանյանի նկատմամբ հայտարարվեց նկատողություն. սա Ստեփանյանի երկրորդ նկատողությունն էր:
«Հրապարակ» թերթը գրում է.
Կիրակի օրը վարչապետ Նիկոլ Փաշինյանը կնոջ եւ որդու ուղեկցությամբ այցելել էր Գյումրի՝ «պերաշկի», եգիպտացորեն ու ձվածեղ ուտելու։ Նույն օրը եղել էին նաեւ Լոռիում ու Տավուշում, որտեղ էլ վառարանի վրա կարտոֆիլ էին խորովել-կերել։ Այցի նպատակների մասին ոչինչ չհայտարարվեց, հասկացվեց, որ գաստրոլոգիական շրջագայություն էր՝ հավանաբար, հասարակ սննդի կարոտից դրդված։ Աննա Հակոբյանը, մասնավորապես, իրենց Գյումրիի այցից լուսանկարներ էր հրապարակել եւ մեկնաբանել․
«Ժողովուրդ ջան։ Մենք ոչ միայն զբոսնում ենք մեր տարբեր քաղաքներում, այլեւ կարկանդակ ու եգիպտացորեն ենք վայելում, խանութներից առեւտուր ենք անում, սրճարաններում ենք լինում եւ այլն, եւ այլն։ Պարզապես միշտ չէ, որ դուք մեզ նկատում եք»։
Վարչապետը չնայած սոցիալապես անապահով ու աղքատ դերվիշի կերպարի մեջ էր, բայց մենք նկատեցինք, որ նրա հագին Հայաստանի ֆուտբոլի ազգային հավաքականի ձմեռային համազգեստի բաճկոնն էր, որի արժեքը 57 հազար դրամ է։ Բացի այդ, Փաշինյանը կրում էր AWI ապրանքանիշի՝ տղամարդու ինքնալարվող մեխանիկական ժամացույց՝ AW1096A.2 մոդելի, որի արժեքը 120 հազար դրամ է։
Ի դեպ, Փաշինյանը գրեթե միշտ այս ապրանքանիշի ժամացույցներ է կրում եւ ամեն անգամ՝ տարբեր մոդելների, այսինքն՝ սա Փաշինյանի հավաքածուում առկա ժամացույցներից հերթականն էր, եւ եթե հաշվի առնենք, որ վարչապետը ստանում է 1 մլն 580 հազար դրամ աշխատավարձ, ապա պետք է նկատենք, որ բոլորովին էլ «բոմժի» հագուկապով չէր, ինչպես որակում էին ֆեյսբուքյան օգտատերերը։ Մանավանդ՝ այդ հագուկապի վրա ակնհայտորեն ինքը ոչինչ չի ծախսում։
«Հրապարակ» թերթը գրում է.
Ազգային ժողովին պատկանող 12 մեքենաները կվերանորոգվեն, որի համար պետբյուջեից հատկացվել է 13.5 մլն դրամ։ Մասնավորապես վերանորոգման կարիք ունեն ԱԺ-ին պատկանող «Տոյոտա land cruiser 200 4.6 GAS», «Տոյոտա Պռադո», «Yoyota hiace», 3 տարբեր թվերի արտադրության «Toyota Camry», «Nissan Centra», «Nissan Urvan», 2 հատ «Nissan X Trail»` 2008, 7՝ 2015 թվականների արտադրության, «Renalut Dokker» մակնիշի ավտոմեքենաներն ու մեկ հատ էլ 2007 թվականի արտադրության «Gazel»:
ԱԺ մեքենաների վերանորոգումն իրականացնելու է «Գարանտսերվիս» ՍՊԸ-ն, որը նաեւ Ոստիկանության եւ ՊՆ մատակարարներից է։ Այս ՍՊԸ-ն ժամանակին Հակոբյան եղբայրների համատեղ սեփականությունն էր․ Վերսանդիկ Հակոբյանի մահից հետո անցել է եղբոր՝ Հրայր Հակոբյանի տնօրինությանը։
«Ժողովուրդ» օրաթերթը գրում է․
Ծանր կամ առանձնապես ծանր հանցանք առաջին անգամ կատարած անձը կարող է ազատվել քրեական պատասխանատվությունից: Այդպիսի կարգավորում է առաջարկում ՀՀ արդարադատության նախարարությունը:
Մասնավորապես, առաջարկվում է ՀՀ քրեական օրենսգրքի 81-րդ հոդվածում (քրեական պատասխանատվությունից ազատելը՝ գործուն զղջալու հիմքով) լրացնել 1.1 մասով եւ դրանով իսկ նախատեսել կարգավորում, որ այն դեպքերում, երբ անձի՝ առաջին անգամ կատարած հանցանքը դասվում է ծանր կամ առանձնապես ծանր հանցագործությունների շարքին, ապա հանցավորի դերի, հանցանքը կատարելիս ու դրանից հետո նրա վարքագծի եւ այլ հանգամանքների հետ կապված բացառիկ հանգամանքների առկայության դեպքում նա կարող է ազատվել քրեական պատասխանատվությունից, եթե համագործակցում է քրեական հետապնդման մարմինների հետ, չի վիճարկում իրեն մեղսագրվող արարքը, վնաս պատճառած լինելու դեպքում հատուցել կամ այլ կերպ հարթել է հանցագործությամբ պատճառված վնասը:
Այստեղ ընդգծենք, որ ՀՀ քրեական օրենսգրքով ծանր հանցագործություններ են համարվում դիտավորությամբ կատարված այն արարքները, որոնց համար սույն օրենսգրքով նախատեսված առավելագույն պատիժը չի գերազանցում տասը տարի ժամկետով ազատազրկումը: Առանձնապես ծանր հանցագործություններ են համարվում դիտավորությամբ կատարված այն արարքները, որոնց համար սույն օրենսգրքով նախատեսված է առավելագույն պատիժ՝ ազատազրկում տասը տարուց ավելի ժամկետով կամ ցմահ ազատազրկում:
Հիմնավորման մեջ նշվում է, որ նախաքննական մարմինների առկա ծանրաբեռնվածության պայմաններում խիստ կարեւոր է նման իրավակարգավորումը, որն էապես նվազեցնում է ինչպես նախաքննական մարմինների, այնպես էլ դատարանների ծանրաբեռնվածությունը:
Այսինքն՝ ստացվում է՝ դատարանները թեթեւացնելու համար ծանր հանցագործներին հնարավորություն են տալիս ազատվելու:
«Հրապարակ» թերթը գրում է.
Մինչ կմեկնարկի մարտի 26-ի Սիսիանի ավագանու ընտրությունների քարոզարշավը, մրցակիցների միջեւ առճակատումը սրվում է։ 3 թեկնածու է առաջադրվել․ իշխող ՔՊ-ն՝ համայնքապետի ԺՊ Արմեն Հակոբջանյանով, ՀՀԿ-ն՝ Սիսիանի էլցանցերի պետ Ջիվան Մարգարյանով, ՔՈ-ն՝ Ավագ Ասատրյանով։ Իշխանությունը քրտնաջան աշխատում է, որ նախորդ անգամվա վիճակը չկրկնվի՝ ՔՊ-ն հաղթի։ Սակայն տեղեկացանք, որ ՀՀԿ-ի թեկնածուն որոշել է վա-բանկ գնալ ու սրել մրցակցությունը։ Օրերս էլցանցը դադարեցրել է համայնքապետարանի բնակարանային կոմունալ վարչության ենթակայության հիմնարկներից շատերի հոսանքամատակարարումը՝ պարտքերի պատճառով։
Կոմունալի վարչության պետ Դավիթ Մարգարյանը ՔՊ թեկնածուի ընտրարշավը ղեկավարող Կարեն Համբարձումյանի մտերիմն է, որն աշխատում է Հակոբջանյանի օգտին։ Սիսիանի մեր աղբյուրներն ասում են, որ միայն նման քայլերով է հնարավոր պայքարը դիտարժան դարձնել։ Սակայն սիսիանցիները սպասում են նախկին համայնքապետ Արթուր Սարգսյանի որոշմանը՝ ում կաջակցի նա, նժարն այդ թեկնածուի օգտին էլ կծանրանա։ Սարգսյանը, ով «Հայաստան» խմբակցության պատգամավոր է, դեռ չի հայտնել, թե ում է աջակցելու։
2022-ի սեպտեմբերի 25-ի ընտրություններին մասնակցած 7 քաղաքական ուժից «Ապրելու երկիր» կուսակցության ցուցակը գլխավորած Արա Զաքարյանը, ով երրորդ արդյունքն էր գրանցել, ըստ Սիսիանից ստացված տեղեկությունների, դարձել է Կարեն Համբարձումյանին պատկանող ավազի հանքի փայատեր եւ հրաժարվել է մասնակցել այս ընտրություններին, Արման Բաբաջանյանի միակ ավագանու անդամը՝ ուսուցչուհի Նախշուն Յազուլյանը, հանգրվանել է ՔՊ ցուցակում։
«Փաստ» օրաթերթը գրում է
Վերջին շրջանում հայ-թուրքական հարաբերությունների գործընթացում տարբեր տեղաշարժեր են տեղի ունենում: Ավելին, Թուրքիայում ավերիչ երկրաշարժից հետո պաշտոնական ցավակցությունից, հումանիտար օգնություն ուղարկելուց, ԱԳ նախարարի այցից հետո այս հարցում գնալով նոր բնագծեր են «նվաճվում», թեպետ՝ առավելապես միակողմանի: Ի մասնավորի, արտգործնախարարության մեր աղբյուրը փոխանցում է, որ կիրակի օրը Նիկոլ Փաշինյանը շնորհավորել է Թուրքիայի նախագահ Ռեջեփ Թայիփ Էրդողանին ծննդյան 69-րդ տարեդարձի կապակցությամբ։
Դա տեղի է ունեցել ոչ թե «սովորական» արարողակարգի համաձայն, այլ միջնորդավորված. շնորհավորանքը փոխանցվել է Ռուբեն Ռուբինյան-Սերդար Քըլըչ «խողովակով»։ Ի դեպ, մեր ունեցած տեղեկություններով, օրերս ԱԳ և էկոնոմիկայի նախարարությունների կողմից ստեղծվել է հանձնաժողով, որը զբաղվելու է հայ-թուրքական սահմանի բացման ռիսկերի գնահատման հարցերով։
Սակայն նույն այդ գերատեսչություններում կարծիք կա, որ այս հանձնաժողովը ավելի շատ արհեստական կառույց է լինելու, որտեղ ընդգրկված են թեմայից անտեղյակ, հիմնականում ՀԿ սեկտորում աշխատած, արտասահմանում կրթություն ստացած երիտասարդներ։
«Ժողովուրդ» օրաթերթը գրում է․ Միջազգային իրավական հարցերով մշտական ներկայացուցիչ Եղիշե Կիրակոսյանն իր հանրային խոսքում մշտապես շեշտել է Հաագայի միջազգային դատարան դիմելու կարեւորությունը, Նիկոլ Փաշինյանի PR թիմն օրեր շարունակ ոգեւորված տարածում էր դատական լսումների տեղեկությունները՝ հասարակությանը կերակրելով, թե, ահա, միջազգային դատարանում քննվում է հայերի համար կարեւորագույն հարցը, եւ վճռից հետո Լաչինի միջանցքը կբացվի եւ այլն: Կյանքը ցույց տվեց, որ ինչպես մյուս բոլոր ոլորտներում, այս դեպքում էլ Նիկոլ Փաշինյանի իշխանությունը քամի տատանելով էր զբաղված: Նրանք ցույց են տալիս, թե գործում են, բայց գործում են իրականում զերո արդյունավետությամբ:
Ինչո՞ւ ենք այդպես ասում. երեկ նույն Եղիշե Կիրակոսյանը հայտարարեց. «Ցավոք, միջազգային իրավունքում չունենք այնպիսի ինստիտուտ, որը կզբաղվի որոշումների հարկադրաբար կատարման ուղղությամբ հարցերով: ՄԱԿ-ի դատարանի որոշումը ենթակա է պարտադիր կատարման կողմերի համար, բայց իրականացման համար ժամկետ չկա նշված»:
Ազնիվ կլիներ, որ Կիրակոսյանն ու իր պրոֆեսիոնալների թիմը հասարակության մոտ անիմաստ սպասումներ չառաջացնելու համար նախապես հայտարարեին, որ ինչ վճիռ էլ կայացնելու լինի ՄԱԿ-ի միջազգային դատարանը, չի կատարվելու այն: Դա պետք է ասեին՝ աշխարհի շատ երկրների նախադեպերը հաշվի առնելով: Ինչ խոսք, օրինակներ շատ կան աշխարհում, որ կայացվել են վճիռներ կամ միջանկյալ միջոցներ, որոնք չեն կատարվել, բայց ուսումնասիրությունը ցույց է տալիս, որ միջազգային դատարանը կարողանում է արդյունավետ աշխատել միայն այն դեպքում, երբ այն պետությունը, որի օգտին կայացվում է որոշումը, ի վիճակի է միջազգային հանրության միջոցով իրագործել այդ վճռի կամ միջանկյալ միջոցի կիրառումը: Կյանքը ցույց տվեց, որ որեւէ կերպ ՀՀ կառավարությունը չի կարողանում միջազգային ճնշում կազմակերպել, որպեսզի կատարվի վճիռը:
Միայն Եվրամիությունը եւ Ֆրանսիան են հայտարարել, որ անհրաժեշտ է կատարել Հաագայի դատարանի որոշումը, սակայն դեռ անօգուտ. 81 օր է՝ փակ է Արցախն աշխարհին կապող միակ ավտոճանապարհը:
«Իրավունք» թերթը գրում է.
«Գյումրիում շրջանառվող լուրերի համաձայն` ՔՊ-ական պատգամավորի մանդատ վերցրած Դավիթ Առուշանյանից հետո փոխքաղաքապետի թափուր մնացած պաշտոնին կնշանակվի «Քաղաքացիական պայմանագիր» խմբակցության ավագանու անդամ Վահագն Մկրտչյանը: Այս նշանակումն ուշագրավ է նրանով, որ 28-ամյա Վահագնը Նիկոլ Փաշինյանի տիկնոջ` Աննա Հակոբյանի հարազատ մորաքրոջ թոռն է: Մինչդեռ ոչ վաղ անցյալում այս իշխանությունը` յուր առաջնորդով, պնդում էր, թե վերջ է դրվելու պետական համակարգում ծանոթ-խնամի-բարեկամ շղթային:
Բայց դե Գյումրիում «ջիգյարը մնում է ջիգյար», որովհետեւ այստեղ մյուս փոխքաղաքապետի պաշտոնին էլ ՀՀ պաշտպանության նախարար Սուրեն Պապիկյանի հորեղբոր որդին է նստած` Արթուր Պապիկյանը»:
«Փաստ» օրաթերթը գրում է.
«Տարածքային կառավարման և ենթակառուցվածքների նախարարությունն առաջարկում է փոփոխություն կատարել «Ավտոմոբիլային տրանսպորտի մասին» օրենքում: Օրենքի 11-րդ հոդվածով սահմանված են կանոնավոր ուղևորափոխադրումների կազմակերպման հիմնական պահանջները։
Հոդվածի 12-րդ մասի համաձայն, երթուղու սպասարկումն իրականացնելու համար սահմանված փոխադրավարձը կարող է վերանայվել օբյեկտիվ պատճառներով (դրամի արժեզրկում կամ արժևորում, վառելիքաքսուքային նյութերի, տրանսպորտային միջոցների և ավտոպահեստամասերի գների փոփոխություն և այլն)՝ մրցութային հանձնաժողովի ներկայացմամբ, և օրենքի 10-րդ հոդվածի 2-րդ մասով սահմանված` երթուղային ցանցը կազմակերպող համապատասխան մարմնի որոշմամբ, իսկ գնման գործընթացի միջոցով ընտրված օպերատորի կամ 100 տոկոս համայնքային մասնակցությամբ օպերատորի կողմից ներհամայնքային ավտոբուսային կանոնավոր փոխադրումների սպասարկման դեպքում՝ ավագանու որոշմամբ:
Սակայն կանոնակարգված չեն փոխադրավարձի վերանայման կարգավորումները, ուստի խնդրահարույց է միասնական երթուղային ցանցի առանձին երթուղիների ուղեգծերի վերանայման դեպքում դրանց փոխադրավարձի սահմանումը։ Օրենքի նախագծով առաջարկվում է վերանայել գործող կարգավորումը փոխադրավարձի բարձրացման վերաբերյալ։ Մասնավորաբար, միասնական երթուղային ցանցերի առանձին երթուղիների ուղեգծերի և սխեմաների փոփոխության դեպքում վերանայել փոխադրավարձը կամ միասնական օպերատորի ընտրության մրցույթով չնախատեսված նոր երթուղիների ձևավորման դեպքում սահմանել փոխադրավարձը առանց մրցույթի։
Փոխադրավարձի վերանայման իրավասությունը կարող է վերանայվել մրցութային հանձնաժողովի ներկայացմամբ և հաստատվել երթուղային ցանցը կազմակերպող համապատասխան մարմնի որոշմամբ: Բացի դա, սահմանվում է, որ միասնական երթուղային ցանցի առանձին երթուղիների ուղեգծերի և սխեմաների փոփոխության, միասնական երթուղային ցանցում նոր երթուղիների ձևավորման դեպքում փոխադրավարձի սահմանման, ինչպես նաև գործող երթուղիների սպասարկումն իրականացնելու համար սահմանված փոխադրավարձի վերանայման պահանջները հաստատում է կառավարությունը»: