Առողջապահության նախարար Անահիտ Ավանեսյանը համարում է, որ անցնող տարվա ընթացքում իշխանությունները շարունակել են համակարգային բարեփոխումները։
MediaHub-ի հետ զրույցում Ավանեսյանը շեշտում է՝ 2022-ը ծանր մարտահրավերներով լի տարի է եղել, բայց մյուս կողմից էլ՝ համակարգային զարգացման։
«Մենք մշտապես փորձում ենք աշխատել երկու ուղղությամբ։ Ճգնաժամային իրավիճակները հասցեագրելու հետ մեկտեղ, աչքաթող չենք անում նաեւ համակարգային բարեփոխումները»,-ասաց նա՝ մանրամասնելով, թե ինչ ասել է համակարգային բարեփոխումներ։
«Պետք է ասեմ, որ 2022-ին բավական մեծ աշխատանք է տարվել, ընդ որում աշխատում ենք մի շարք ուղղություններով՝ թե՛ մասնագետների վերապատրաստման, թե՛ ենթակառուցվածքների բարելավման, ինչու չէ՝ առողջապահական ծրագրերին հասանելիություն ապահովելու ուղղությամբ»,-նշեց նա։
Առողջապահության նախարարը 2023թ․-ից ակնկալում է խաղաղություն։
«Խաղաղություն մեր երկրին, սահմաններին, ընտանիքների ներսում։ Ես վստահ եմ, որ մեր ստեղծագործ, տոկուն, ուժեղ ժողովուրդը հնարավոր ամեն զարգացման համար ունի այդ պոտենցիալը»,-հավելեց նա։
Լիա Սարգսյան