Միացյալ Նահանգների նախագահ Ջո Բայդենը մեղմացրել է դաշնային մակարդակով մահապատժի դատապարտված 40 բանտարկյալներից մեծ մասի դատավճիռը։
Մահապատիժը կփոխարինվի ցմահ ազատազրկմամբ՝ առանց վաղաժամկետ ազատման իրավունքի։ Նրանց թվում են նաև երեխաներ սպանած անձինք։
Հունվարին նախագահի պաշտոնը ստանձնող Դոնալդ Թրամփը չի կարողանա չեղարկել այս որոշումը, հայտնել է BBC-ն։
«Ես դատապարտում եմ այդ մարդասպաններին, սգում եմ անմեղ զոհերի համար և ցավակցում նրանց ընտանիքներին, որոնք կրել են անսահման կորուստներ, — ասված է ԱՄՆ ղեկավարի հայտարարության մեջ։ «Բայց ղեկավարվելով իմ խղճով և իմ փորձով՝ որպես պետական պաշտպան, Սենատի դատական կոմիտեի նախագահ, փոխնախագահ և այժմ՝ նախագահ, ես խորապես համոզված եմ, որ պետք է վերջ տանք դաշնային մակարդակով մահապատժի կիրառմանը»։
Բայդենի ներման որոշումը չի տարածվում երեքի վրա, որոնք մեղավոր են ճանաչվել ահաբեկչական հարձակումների կամ ատելության հիմքով զանգվածային սպանությունների համար։
Նրանք են՝ Ջոհար Ցարնաեւը, որը դատապարտվել է 2013 թվականի Բոստոնի մարաթոնի պայթյունի համար, Դիլան Ռուֆը, որը 2015 թվականին Չարլսթոնի եկեղեցում գնդակահարել է 9 սևամորթ հավատացյալի, և Ռոբերտ Բաուերսը, որը 2018 թվականին հարձակվել է Փիթսբուրգի սինագոգի վրա և սպանել 11 հավատացյալի։