Այս պահին Բերձորը, Աղավնոն և Սուսը գտնվում են ռուսական խաղաղապահ ուժերի վերահսկողության ներքո, բնակավայրերը դեռ չեն փոխանցվել Ադրբեջանին, չնայած ադրբեջանցի զինվորականների այցեր բնակավայրեր ռուս խաղաղապահների ուղեկցությամբ լինում են։ Այս մասին փոխանցում են MediaHub.am-ի աղբյուրները։
«Նոր ճանապարհի շահագործմամբ պայմանավորված` դեռևս հստակ չէ, օգոստոսի 25–ին ինչ կլինի, բնակավայրերում այլևս հայ բնակչություն չկա, բայց կրկնում եմ՝ այն դեռ չի փոխանցվել ադրբեջանական կողմին»,-նշեց մեր աղբյուրը։
Անդրադառնալով Բերձորում ադրբեջանական հրշեջ մեքենայի ժամանմանը, մեզ ասացին, որ այդ ամենը ևս կազմակերպվել է ռուս խաղաղապահների իմացությամբ, հայկական կողմը կապ չունի։
MediaHub.am-ը կապ հաստատեց նաև Արցախի Տարածքային կառավարման և ենթակառուցվածքների նախարարության հետ, որտեղից ասացին, որ չեն կարող այդ հարցին անդրադառնալ, հարցի հասցեատերը Անվտանգության խորհուրդն է, իսկ այս կառույցի մամուլի խոսնակը զանգերն ապատասխան թողեց։
Հիշեցնենք, որ նախատեսվում է Բերձոր, Ներքին Սուս, Աղավնո բնակավայրերի փոխանցումը ադրբեջանական կողմին օգոստոսի 25–ին, սակայն Երևանում Ռուսաստանի դեսպանության խորհրդական-դեսպանորդ Մաքսիմ Սելեզնյովը հայտարարել էր, որ ռուս խաղաղապահները ոչ մի սանտիմետր չեն տեղաշարժվի Լաչինի գործող միջանցքից, քանի դեռ նոր ճանապարհը չի շահագործվել։
Անի Գևորգյան