Ստամբուլի հացահատիկի արտահանման համաձայնագիրը քայլ է ճիշտ ուղղությամբ։ Այս մասին ուրբաթ օրը՝ հուլիսի 22-ին, ասել է ԵՄ դիվանագիտության ղեկավար Ժոզեպ Բորելը։
«Այսօրվա Ստամբուլի համաձայնագիրը քայլ է ճիշտ ուղղությամբ։ Մենք կոչ ենք անում այն արագ իրականացնել»,- գրել է նա Twitter-ի իր էջում։
Ավելի վաղ ՌԴ պաշտպանության նախարար Սերգեյ Շոյգուն ՄԱԿ-ի գլխավոր քարտուղար Անտոնիո Գուտերեշի հետ հուշագիր է ստորագրել համաշխարհային շուկա ռուսական գյուղատնտեսական արտադրանքի և պարարտանյութերի մատակարարման դյուրացման մասին։ Նա նշել է, որ Ստամբուլում երկու փաստաթուղթ է ստորագրվել, որոնք ուղղված են համաշխարհային շուկաներին սննդամթերքի ու պարարտանյութերի մատակարարման խնդիրների լուծմանը, և այդ համաձայնագրերը մեկ փաթեթ են ներկայացնում։
Միաժամանակ, լրատվամիջոցները հայտնում են, որ ուկրաինական պատվիրակությունը Թուրքիայի և ՄԱԿ-ի հետ համաձայնագիր է ստորագրել հացահատիկի արտահանման վերաբերյալ։
Մոսկվայի, Կիևի, Անկարայի և ՄԱԿ-ի միջև Ուկրաինայի տարածքից հացահատիկի արտահանման մասին ստորագրված պայմանագրի գործողության ժամկետը 120 օր է։
Հուլիսի 23-ին կսկսվեն հացահատիկի արտահանման համատեղ համակարգող կենտրոնի ստեղծման աշխատանքները։ Ինչպես նշել է ՄԱԿ-ի բարձրաստիճան պաշտոնյան՝ կազմակերպությունն արդեն քննարկել է, թե ում է գործուղելու ժամանակավոր հիմունքներով՝ մինչև մշտական կազմը որոշվի։ Հայտնի է, որ կենտրոնում կլինեն Ռուսաստանի, Թուրքիայի և Ուկրաինայի ներկայացուցիչները։