Չեխիայի արհմիությունները կոչ են արել զանգվածային ցույց անցկացնել ընդդեմ էներգակիրների եւ սննդամթերքների գների կտրուկ աճի՝ միաժամանակ պահանջելով աշխատավարձերի զգալի բարձրացում:
Եվրոպային ծանր ձմեռ է սպասվում, քանի որ Ռուսաստանից գազի մատակարարումների կրճատումը հանգեցրել է հումքի գների կտրուկ աճի, ինչը, իր հերթին, հանգեցնում է էլեկտրաէներգիայի գների բարձրացման եւ կոմունալ ծառայությունների վճարների մի քանի անգամ ավելացման: Պարենային ապրանքների գները նույնպես աճում են, իսկ ինֆլյացիան վերջին երեք տասնամյակի ամենաբարձր մակարդակին է եւ չորրորդն է Եվրոպական միությունում, հայտնում է Reuters-ը։
Չեխիայի կառավարությունը, ինչպես մյուս երկրներինը, փորձում է օգնել խոցելի տնային տնտեսություններին եւ ընկերություններին, սակայն բախվում է աճող ճնշման, որպեսզի ավելի արագ գործի:
Շաբաթ օրը Պրահայում բողոքի ակցիային մասնակցել է մոտ 70 000 մարդ։
Արհմիութենական խմբերը հոկտեմբերի 8-ին հայտարարել են իրենց սեփական ցույցի՝ վերջին տասնամյակում առաջին խոշոր ակցիայի մասին: «Մենք գոհ չենք ներկա իրավիճակից… Մենք ծայրահեղականներ կամ նման այլ բաներ չենք, մենք մարդիկ ենք, որոնք մտահոգվում են իրենց ապագայի համար»,- ասել է Չեխիա-Մորավիայի արհմիությունների համադաշնության ղեկավար Յոզեֆ Ստրեդուլան։ «Եկեք եւ ցույց տանք (նրանց) միասին, ինչ ենք մենք մտածում»,- հավելել է Ստրեդուլան, որը նաեւ թեկնածու կլինի հաջորդ տարվա սկզբին կայանալիք նախագահական ընտրություններում:
Երկրորդ եռամսյակում Չեխիայում իրական աշխատավարձերը տարեկան կտրվածքով նվազել են 9,8 տոկոսով, ինչը տասնամյակների ընթացքում ամենաարագ անկումն է, քանի որ գնաճը կտրուկ նվազեցրել է աշխատավարձերը:
Զայրույթը մեծանում է էլեկտրաէներգիայի վճարների հետ մեկտեղ, եւ տնային տնտեսությունները սկսում են կրճատել ծախսերը: Տնտեսությունը, ամենայն հավանականությամբ, կընկնի ռեցեսիայի մեջ այս տարվա երկրորդ կիսամյակում՝ պահանջարկի նվազմանը զուգընթաց:
Աշխատավարձերի հետ կապված պոտենցիալ բարձր պահանջները նույնպես կենտրոնական բանկի ուշադրության կենտրոնում են, որը 2021 թվականի հունիսից բարձրացրել է տոկոսադրույքները 675 բազիսային կետով, սակայն բազային տոկոսադրույքը թողել է 7,00 տոկոս՝ ամենաբարձր մակարդակը 1999 թվականից ի վեր: