Այսօր ՀՀ ԱԳՆ-ն հայտարարեց, թե Ուկրաինայում ՀՀ դեսպանությունն աշխատում է բնականոն հունով՝ պահպանելով անվտանգության անհրաժեշտ կանոնները:
Այս հրապարակումից հետո MediaHub-ի հետ կապ հաստատեց մեր հայրենակիցը Կիևից և դժգոհեց՝ ինչո՞ւ ՀՀ ԱԳՆ-ն չի խոսում այն մասին, որ դեսպանության աշխատանքը ֆորմալ բնույթ է կրում և նրանք որևէ կերպ չեն արձագանքում ուկրաինահայերի խնդիրներին ու նրանց դիմումներին, հեռախոսազանգերին: Իսկ եթե հաջողվում է կապ հաստատել ՀՀ դեսպանի հետ, որը, նրա որակմամբ «շատ չոր ու կոպիտ անձնավորություն է», ապա առաջին հարցը, որ նա տալիս է, ոչ թե ի՞նչ է եղել, ի՞նչ է պատահել, այլ՝ որտեղի՞ց իր համարը շարքային քաղաքացուն.
«Այնպիսի տպավորություն է, որ Ուկրաինայում պատերազմ չկա, դեսպանն էլ ֆորմալ կատարում է իր պարտականությունները՝ դեսպանության շենքում: Բայց այդ պարտականությունները որևէ կապ չունեն իր հայրենակիցների հետ»,- դժգոհեց նա:
Ապա դիմեց ԱԳՆ-ին. «Հարգելի ԱԳՆ, կլինի Կիևից ձեր դեսպանին տանեք, նենց մեկին բերեք, որ մերը լինի, մեզնով զբաղվի, ոչ թե չգիտես ինչով»:
Քաղաքացին ասաց, որ հայերը շատ դեպքերում անգամ դեսպանատուն չեն էլ դիմում՝ անիմաստ ժամանակի կորուստ է, և միակ կառույցը, որ արձագանքում է նրանց, դա Լվովում մեր հյուպատոսարանն է, որը բավականին ակտիվ է, արձագանքում է հայերին, հնարավորինս օգնում ու աջակցում նրանց:
«Հայերից շատերը հեռացել են Ուկրաինայից, դեռ ամիսներ առաջ: Ովքեր մնացել են, չասեմ՝ համակերպվել են ճակատագրի հետ, բայց դրա նման մի բան, ասում են, որ այստեղ իրենց տունն է ու ոչ մի տեղ չեն գնա՝ ինչ կլինի կլինի»,- ասաց նա:
Նշեց, որ ապաստարաններ այլևս չեն էլ իջնում, որովհետև անիմաստ են դա համարում՝ «մեկ է մահանալու ենք» սկզբունքով:
Ասաց, որ որպես այդպիսին չկա կազմակերպություն, որը կզբաղվի իրենց հարցերով, անգամ Ուկրաինայի հայ համայնքը: Դրա համար բոլորը ինքնակազմակերպվում են ու այդպես գոյատևում:
«Պատերազմ է... ինչ ասեմ՝ բարդ է, դժվար է, բայց այս փորձությունն էլ կհաղթահարենք: Ամենուր է այսօր վատ իրավիճակ, բայց մեզ վրդովվեցնում է այն, որ մարդիկ, որոնք ոչինչ չեն անում, բուռն գործունեության իմիտացիայով են զբաղված: Այնինչ ընդամենը գալիս են դեսպանատուն, դեմքի խելացի արտահայտությամբ զանգեր անում, թեյ խմում, գնում իրենց գործերով, մոռանալով, որ իրենց գործերը՝ մենք ենք ու մեր դարդերը»,- հավելեց նա:
Նշենք, որ Ղրիմի կամրջի պայթյունից հետո իրավիճակը Ուկրաինայում կտրուկ լարվել է: Այսօր լուրեր էին ստացվում, որ պայթյուններ են որոտացել Օդեսսայի, Լվովի մերձակայքում, երկու օր է պայթյուններ են Կիևում: Վերջին երկու օրերին օդային տագնապը պարբերաբար միանում է: