Ուզբեկստանի Կարակալպակստանի ինքնավարության Նուկուս քաղաքում տեղի ունեցած անկարգությունների ժամանակ զոհվել է 18 մարդ, 243-ը՝ վիրավորվել: Նրանցից 94-ը հիվանդանոցներում են. այդ մասին հայտնել են Ուզբեկստանի Ազգային գվարդիան և գլխավոր դատախազությունը, փոխանցում է kommersant-ը:
«Հուլիսի 1-2-ը բերման է ենթարկվել 516 անձ, կատարվում է քննություն։ Առանձին քաղաքացիների նկատմամբ կիրառվել են վարչական միջոցներ, նրանք ազատ են արձակվել», - ասել է Ուզբեկստանի ազգային գվարդիայի ներկայացուցիչ Դավրոն Ջումանիյազովը։
Գլխավոր դատախազությունը հայտարարել է, որ անկարգությունների փաստով քրեական գործ է հարուցել «Ուզբեկստանի Հանրապետության սահմանադրական կարգի ոտնահարում» հոդվածով։
Կարակալպակստանում բողոքի ցույցերը սկսվել են հուլիսի 1-ին՝ այն բանից հետո, երբ կառավարությունը ներկայացրել է նոր սահմանադրության նախագիծը, որով առաջարկվում է տարածաշրջանը զրկել ինքնիշխանությունից և հանրաքվեով Ուզբեկստանից անջատվելու իրավունքից։ Ուզբեկստանի իշխանությունները որոշել են երկարաձգել փոփոխությունների նախագծի քննարկումը մինչև հուլիսի 15-ը և պահպանել Կարակալպակստանի ինքնավարությունը։