Լեհաստանի նախագահ Անջեյ Դուդան ժամանել է Կիև՝ Ուկրաինայի նախագահ Վլադիմիր Զելենսկիի հետ բանակցությունների։ РИА Новости գործակալության փոխանցմամբ՝ այդ մասին լրագրողներին հայտնել է Լեհաստանի նախագահի աշխատակազմի ղեկավար Պավել Շրոտը։
«Նախագահ Անջեյ Դուդան ժամանել է Կիև։ Նա այնտեղ է մեկնել նախագահ Վլադիմիր Զելենսկիի հրավերով», - ասել է Շրոտը։
Նրա խոսքով, Դուդայի այցը Կիև «նախատեսում է հանդիպում նախագահի հետ, բանակցություններ Ուկրաինային աջակության հարցի շուրջ, ռազմական առումով՝ ռուսական ագրեսիայից պաշտպանվելու համար անհրաժեշտ սարքավորումների մատակարարման, ինչպես նաև տնտեսական, հումանիտար և այլ ոլորտներում աջակցության շուրջ»։
Շրոտը հավելել է, որ Դուդան կմասնակցի նաև Կիևում «Ղրիմյան հարթակ» գագաթնաժողովի աշխատանքներին։
«Ղրիմյան հարթակ» երկրորդ միջազգային գագաթնաժողովը, որը կազմակերպվել է Ուկրաինայի նախաձեռնությամբ, կանցկացվի առցանց՝ օգոստոսի 23-ին։ Դրան կմասնակցեն տասնյակ երկրներ ու միջազգային կազմակերպություններ. իր մասնակցությունը հաստատել է ՆԱՏՕ-ի գլխավոր քարտուղար Յենս Ստոլտենբերգը։ Գագաթնաժողովի նպատակների թվում Կիևի իշխանությունները նշում են Ղրիմի «ապաօկուպացման» ուղիների քննարկումը։
Ռուսաստանի Դաշնության նախագահի մամուլի քարտուղար Դմիտրի Պեսկովը գագաթնաժողովը որակել է որպես հակառուսական և խիստ ոչ բարեկամական իրադարձություն։