Մոսկվան երբեք չի հրաժարվել Բաքվի և Երևանի միջև բանակցային գործընթացում «ազնիվ միջնորդի» իր դերից: Ասել է Հայաստանում ՌԴ դեսպան Սերգեյ Կոպիրկինը «Դաշնակիցներ. ՀԱՊԿ» հարտարակությանը տված հարցազրույցում:
Նրա խոսքով՝ շատ ռիսկեր կարելի էր մեղմացնել, եթե 2022 թվականի սեպտեմբերին Երևանը համաձայներ ՀԱՊԿ-ի միջոցով իրականացնել մի շարք միջոցառումներ՝ կայունացնելու իրավիճակը Ադրբեջանի հետ սահմանին։
«Հայաստանի մասնակցությունը ՀԱՊԿ-ի աշխատանքներին համապատասխանում է երկրի շահերին և նպաստում է տարածաշրջանում խաղաղությանը»,- ընդգծել է դիվանագետը։
Կոպիրկինը նշել է, որ Հայաստանում ԵՄ առաքելությունը ոչ թե պաշտպանում է երկիրը, այլ հետախուզություն է հավաքում, և որ Հարավային Կովկասի ճակատագիրը պետք է որոշեն բացառապես տարածաշրջանի երկրներն ու հարևան գործընկեր պետությունները։
Դեսպանը նաև ասել է, որ անհրաժեշտ է հնարավորինս արագ վերսկսել եռակողմ աշխատանքային խմբի աշխատանքը՝ տարածաշրջանում հաղորդակցությունների ապաշրջափակման համար։ «Ռուսաստանի Դաշնությունը հանդես է գալիս ոչ թե որևէ կոնկրետ երթուղու ստեղծման, այլ ավելի շուտ հաղորդակցությունների ամբողջական ապաշրջափակման կողմնակից»,- հավելել է նա։