Եվրամիության գործադիր իշխանությունը կիրակի օրը դաշինքին խորհուրդ է տվել դադարեցնել Հունգարիային մոտ 7,5 միլիարդ եվրոյի ֆինանսավորումը՝ ժողովրդավարական հետընթացի եւ ԵՄ գումարների հնարավոր չարաշահման մտահոգությունների պատճառով, հաղորդում է AP լրատվական գործակալությունը:

ԵՄ բյուջեի հարցերով հանձնակատար Յոհաննես Հանը նշել է, որ, չնայած Հունգարիայի կողմից առաջարկված միջոցներին, որոնք ուղղված են թերությունների վերացմանը, Եվրահանձնաժողովը խորհուրդ է տալիս դադարեցնել մոտ 7,5 միլիարդ եվրոյի չափով միջոցների տրամադրումը:

Այս գումարը գոյանալու է Հունգարիայի կողմից տրամադրվող համախմբման հիմնադրամներից: Դրամական այս ծրարը, որը դաշինքի բյուջեի ամենամեծերից մեկն է, օգնում է երկրներին՝ իրենց տնտեսությունները եւ ենթակառուցվածքները համապատասխանեցնել ԵՄ չափանիշներին:

Հանը նշել է, որ Հունգարիան, մինչեւ նոյեմբերի 19-ը, պետք է պատասխանի հարցերին: Ֆինանսավորումը կասեցնելու ցանկացած գործողություն պետք է հաստատվի ԵՄ անդամ 27 երկրների կողմից, եւ դրա համար անհրաժեշտ է մեծամասնություն՝ այսինքն դաշինքի անդամ 27 պետությունների 55 տոկոսը, որը ներկայացնում է ԵՄ ընդհանուր բնակչության առնվազն 65 տոկոսին:

Եվրահանձնաժողովը շուրջ մեկ տասնամյակ մեղադրում է Հունգարիայի վարչապետ Վիկտոր Օրբանին՝ դեմոկրատական ​​ինստիտուտները քանդելու, լրատվամիջոցների նկատմամբ վերահսկողություն սահամնելու եւ փոքրամասնությունների իրավունքները ոտնահարելու համար։ Օրբանը, ով իշխանության ղեկին է 2010 թվականից, հերքում է այդ մեղադրանքները:

Ելույթ ունենալով Բրյուսելում կայացած ԵՄ հանձնակատարների հանդիպումից հետո՝ Հանը ողջունել է խնդիրը լուծելու Հունգարիայի առաջարկը՝ ասելով, որ իր առաջարկած շտկման միջոցները ճիշտ ուղղությամբ են գնում:

Նա ասել է, որ այս միջոցառումները կարող են մեղմել հանձնաժողովի որոշ մտահոգություններ, եթե դրանց հետամուտ լինեն եւ համապատասխան քայլեր ձեռնարկվեն: Սակայն նաեւ նշել է, որ բյուջեի համար ռիսկը այս փուլում առկա է, ուստի ԵՄ բյուջեն պատշաճ կերպով պաշտպանված լինելը երաշխավորել չեն կարող:

Հունգարական լրատվամիջոցները հայտնում են, որ Օրբանի ազգայնական կառավարությունը մտադիր է, երկուշաբթի օրը, հայտարարել նոր օրենսդրության մասին։ Անցյալ շաբաթ ԵՄ օրենսդիրները մտահոգություն էին հայտնել, որ դա կարող է պարզապես ժամանակ շահելու հնարք լինել:

Հինգշաբթի ընդունված բանաձեւում օրենսդիրները նշել են, որ Հունգարիայի ազգայնական կառավարությունը միտումնավոր փորձում է խարխլել դաշինքի ժողովրդավարական արժեքները: Նրանք շեշտել են, որ Բուդապեշտի կառավարությունը, որը Օրբանը նկարագրում է որպես «ոչ լիբերալ ժողովրդավարություն», վերածվել է ընտրական ինքնավարության հիբրիդային ռեժիմի: Սրանում օրենսդիրները մեծ մասամբ մեղադրում են ԵՄ անդամ պետություններին, որոնք աչք են փակում հնարավոր չարաշահումների վրա։