Արդեն 29 օր է, ինչ Լաչինի միջանցքն ադրբեջանական կողմը ապօրինաբար փակ է պահում։
Արցախը փորձում է դիմակայել, սակայն ինչպես համայնքապետներն են նշում՝ որքան էլ փորձում են ճգնաժամը զսպել, բայց ամեն օր այն ավելի անհնար է դառնում, իրենց խոսքով՝ յոլլա են գնում։
Շուշիի շրջանի Լիսագոր համայնքի ղեկավար Գագիկ Նասիբյանը MediaHub.am-ի հետ զրույցում նշեց, որ չեն հանձնվում։
«Հիմա, գրեթե, ոչ մի բանի կարիք չկա։ Ես ճանապարհը փակելու ժամանակ Ստեփանակերտում էի, չէի կարողանում գյուղ վերադառնալ, հիմա մի կերպ եկել եմ։ Մեր սնդդի պաշարը դեռ չի վերջացել, երեխաները դպրոց են գնում»,-պատմեց նա։
Մարտունու շրջանի Նոր Շենի գյուղապետ Գևորգ Հարությունյանը ներկայացրեց, որ հիմնական խնդիրը դիզվառելիքն է եղել, սակայն Արցախի Կառավարությունը փորձում է մեղմացվել բոլոր խնդիրները։
«Չգիտենք, թե ինչ կլինի, երբ կբացվի ճանապարհը, հույսներս չենք կտրում»,-նշեց գյուղապետը։
Մարտունու շրջանի Բերդաշեն համայնքի ղեկավար Ժորիկ Պողոսյանն էլ պատմեց, որ գյուղում ամեն ինչ հնարավորինս խնայողաբար են օգտագործում։
«Ինչպես մյուս գյուղերում, այնպես էլ այստեղ, եղածը փորձում ենք արդյունավետ օգտագործել, որ սովի չհասնենք։ Թոշակ ստանալու խնդիր չունենք հիմա»։
Արցախցիներին մնում է միայն հարմարվել իրավիճակին՝ չհանձնվելով։
Նշենք, որ Արցախի Կառավարությունում այսօր քննարկվել է կտրոնային համակարգի ներդրումը, ինչը հնարավորություն կտա առավելագույնս համաչափ բաշխել առկա պարենային ապրանքները:
Լիաննա Թորոսյան