Չեխիայի կառավարությունը հաջորդ շաբաթ կներկայացնի պետական էներգաթրեյդերի ստեղծման ծրագիր՝ ձմռան շեմին, գների կտրուկ բարձրացման հետ կապված, դպրոցների, հիվանդանոցների եւ պետական այլ հաստատությունների համար էներգակիրներ գնելու նպատակով, կիրակի ասել է արդյունաբերության նախարար Յոզեֆ Սիկելան, տեղեկացրել է Reuters-ը։

Նա չի ասել, սակայն, թե որքան ժամանակ կպահանջվի պետական թրեյդերի ստեղծման համար, բայց նշել է, որ պատրաստ կլինի մինչեւ նոր տարի գնել էներգիա պետական հաստատությունների համար։

«Ես շատ արագ կստեղծեմ գործակալությունը, եւ այդ գործակալության առաջին խնդիրը կլինի էներգիա գնելը պետական հատվածի համար,- ասել է նախարարը նորությունների հեռուստատեսային ծրագրի քննարկման ժամանակ։- Չորեքշաբթի ես կտեղեկացնեմ կառավարությանը մեր ձեռնարկելիք քայլերի մասին, եւ մենք կընտրենք տարբերակներից մեկը, որը հետո պաշտոնապես կձեւակերպենք։ Ես նախընտրում են ամենաարագ տարբերակը՝ գործակալության ստեղծումը»։

Սիկելեն նաեւ տեղեկացրել է, որ հավանություն է տվել մարժինալ պահանջների բավարարման համար չեխական նորարարական EPH խմբի եւ Sev.en Energy ընկերության վարկեր ստանալու հայտերին։

Հուլիսին Չեխիայի կառավարությունը հայտարարել էր, որ կօգնի CEZ պետական ընկերությանը  ֆինանսավորել էլեկտրաէներգիայի եւ գազի առեւտուրը ձմռան սեզոնին ընդառաջ, 3 մլրդ եվրո արժեքով վարկային համաձայնագրի միջոցով։

Սիկելեն չի ճշտել, սակայն, EPH-ի եւ Sev.en-ի, որոնք պատկանում են չեխ միլիարդատերեր Դանիել Կրետինսկուն եւ Պավել Տիկաչին, օգնության գումարը։

Եվրոպայում էլեկտրաէներգիայի գներն արդեն գրեթե ամեն օր նոր ռեկորդներ են սահմանում, իսկ անցած ամիս Գերմանիայում առաջին անգամ բազային պայմանագիրը գերազանցել է մեկ մեգավատ/ժամը 1 000 եվրոն, ինչի հետեւանքով կառավարություններն սկսել են տնային տնտեսությունների եւ ձեռնարկությունների պաշտպանության միջոցներ ձեռնարկել։