Իսրայելը կարձագանքի շիական «Հեզբոլլահ» շարժման կողմից Լիբանանում իր ուժերի դեմ ուղղված ցանկացած հարձակմանը, հայտարարել է հրեական պետության վարչապետ Բենիամին Նեթանյահուն՝ ընդգծելով, որ իսրայելական զորքերը չեն մտադիր դուրս գալ հարավային Լիբանանից։

Նա նշել է, որ այսօր առավոտյան հանդիպում է ունեցել Իսրայելի պաշտպանության նախարար Իսրայել Կացի և շտաբի պետ Էյալ Զամիրի հետ՝ Լիբանանի վրա գիշերը հասցված հարվածներից հետո ստեղծված իրավիճակը գնահատելու համար։ «Իմ հրամանը շատ հստակ է. Իսրայելը չի ​​հանդուրժի մեր զինվորների կամ մեր տարածքի վրա հարձակումները, և մենք կստիպենք «Հըզբոլլահին» շատ բարձր գին վճարել այդ հարձակումների համար։ Իսրայելի պաշտպանության բանակը միջոցներ կձեռնարկի՝ կանխելու մեր ուժերին և մեր տարածքին ուղղված ցանկացած սպառնալիք», - ասել է Նեթանյահուն։

«Իսրայելը կմնա հարավային Լիբանանի անվտանգության գոտում այնքան ժամանակ, որքան անհրաժեշտ է [իր] հյուսիսային բնակավայրերը պաշտպանելու համար», - ընդգծել  է վարչապետը։

Նեթանյահուն հայտարարել է, որ Լիբանանի վրա գիշերը և այսօր առավոտյան իրականացված հարվածների շարքը պատասխան է եղել հարավային Լիբանանում իսրայելական տանկային անձնակազմի վրա հարձակմանը։ Այդ ժամանակ զոհվել է չորս զինվոր, այդ թվում՝ գնդապետի կոչում ունեցող գումարտակի հրամանատար։

««Հըզբոլլահ»-ի այս հրեշավոր հարձակումից հետո, որը հրադադարի կոպիտ խախտում է, երեկ երեկոյան ես հրամայեցի Իսրայելի պաշտպանության բանակին հզոր հարված հասցնել «Հըզբոլլահին»», - ընդգծել է Իսրայելի վարչապետը։