Մեքսիկայի կառավարությունը վերանայում է Կուբա նավթի առաքումը շարունակելու հարցը՝ նախագահ Կլաուդիա Շեյնբաումի վարչակազմում աճող մտավախությունների ֆոնին, որ Մեքսիկան կարող է ԱՄՆ-ի կողմից հաշվեհարդար տեսնել այս քաղաքականության համար, գրել է Reutеrs-ը` հղում անելով քննարկումներին ծանոթ երեք աղբյուրների։

Դեկտեմբերին Վենեսուելայում նավթատարների ամերիկյան շրջափակումը և այս ամիս նախագահ Նիկոլաս Մադուրոյի դրամատիկ ձերբակալությունը դադարեցրել են Վենեսուելայի նավթի առաքումները Կուբա, ինչը Մեքսիկային թողել է որպես կղզու ամենամեծ մատակարարը, որը տառապում է էներգիայի պակասից և զանգվածային անջատումներից։

Մեքսիկայի կարևոր դերը Կուբա նավթ ուղարկելու մեջ նաև ԱՄՆ-ի հարավային հարևանին է դրել Վաշինգտոնի թիրախում։ Նախագահ Դոնալդ Թրամփը շեշտել է, որ Կուբան «պատրաստ է ընկնել» և հունվարի 11-ին «Truth Social»-ում գրել է. «ԿՈՒԲԱ ԱՅԼԵՎՍ ՆԱՎԹ ԵՎ ՓՈՂ ՉԻ ԳՆԱ - ԶՐՈ»։

Շեյնբաումը հրապարակավ հայտարարել է, որ Մեքսիկան կշարունակի նավթի առաքումները Կուբա՝ ասելով, որ դրանք հիմնված են երկարաժամկետ պայմանագրերի վրա և համարվում են միջազգային օգնություն: Սակայն Մեքսիկայի կառավարության բարձրաստիճան աղբյուրները նշել են, որ քաղաքականությունը ներքին վերանայման փուլում է, քանի որ Շեյնբաումի կաբինետում աճում է անհանգստությունը, որ առաքումները կարող են նյարդայնացնել Թրամփին։

Մեքսիկան փորձում է բանակցել USMCA Հյուսիսամերիկյան առևտրային համաձայնագրի վերանայման շուրջ (ազատ առևտրի համաձայնագիր Միացյալ Նահանգների, Մեքսիկայի և Կանադայի միջև)՝ միաժամանակ համոզելով Վաշինգտոնին, որ Մեխիկոն բավարար միջոցներ է ձեռնարկում թմրակարտելների դեմ պայքարելու համար, և որ ԱՄՆ ռազմական գործողությունները Մեքսիկայի տարածքում խմբավորումների դեմ ո՛չ ողջունելի են, ո՛չ էլ անհրաժեշտ։

Կուբայական նավթի առաքումների կառավարության վերանայման մասին նախկինում չի հաղորդվել, և աղբյուրները խնդրել են անանուն մնալ՝ քննարկելու զգայուն հարցը: Մնում է անհասկանալի, թե ինչ վերջնական որոշում կարող է կայացնել Մեքսիկայի կառավարությունը, քանի որ աղբյուրները նշել են, որ լիակատար դադարեցումը, կրճատում ու լիարժեք շարունակությունը դեռևս սեղանին են։

Մեքսիկայի նախագահականը Reuters-ին հայտնել է, որ երկիրը «միշտ համերաշխ է եղել Կուբայի ժողովրդի հետ» և հավելել է, որ Կուբա նավթի առաքումը և կուբացի բժիշկների ծառայությունների համար վճարելու առանձին համաձայնագիրն «ինքնիշխան որոշումներ են»: Կուբայի կառավարությունը չի արձագանքել մեկնաբանության հարցմանը։

Սպիտակ տան պաշտոնյան ասել է. «Ինչպես նշել է նախագահը, Կուբան այժմ ձախողվում է իր սեփական կամքով... Վենեսուելայից Կուբա այլևս նավթ կամ գումար չի գնա, և նա կտրականապես առաջարկում է, որ Կուբան համաձայնության գա, մինչև չափազանց ուշ լինի»։