Հնդկաստանի Օդիշա նահանգի մի բնակիչ իր մահացած քրոջ մնացորդներով եկել է բանկի մասնաճյուղ՝ փորձելով ապացուցել նրա մահը և նրա հաշվից 20,000 ռուփի (մոտավորապես 210 դոլար) հանել, գրել են ԶԼՄ-ները՝ հղում անելով ոստիկանությանը։

Կինը մահացել էր երկու ամիս առաջ հիվանդության պատճառով, և անասունների վաճառքից վաստակած գումարը մնացել էր նրա հաշվին՝ տեղական բանկում։ Տղամարդը նախկինում այցելել էր մասնաճյուղ, բայց աշխատակիցները պահանջել էին փաստաթղթեր, որոնք Մունդան չէր կարողացել տրամադրել իր անգրագիտության պատճառով։

«Ես մի քանի անգամ գնացի բանկ, և նրանք ինձ ասացին, որ բերեմ հաշվի տիրոջը՝ նրա անունով գումար հանելու համար։ Ես ասացի նրանց, որ նա մահացած է, բայց նրանք անտեսեցին ինձ և պնդեցին, որ ես նրան բերեմ բանկ։ Հուսահատությունից դրդված՝ ես փորեցի գերեզմանը և վերցրի նրա կմախքը՝ որպես մահվան ապացույց», - «India Today» հրատարակությանը պատմել է 50-ամյա Ջիտու Մունդան։

Դեպքի վայր ժամանած ոստիկանները տղամարդուն վստահեցրել են, որ կօգնեն նրան վերադարձնել գումարը: «India Today»-ի տվյալներով՝ կնոջ կմախքը հետագայում վերաթաղվել է իրավապահ մարմինների աշխատակիցների ներկայությամբ։

Տեղական իշխանությունները բանկին հանձնարարել են կազմակերպել միջոցների հնարավորինս շուտ տրամադրումը, քանի որ Ջիտու Մունդան մնում է իր մահացած քրոջ ակտիվների միակ օրինական պահանջատերը, հաղորդում է ամսագիրը՝ հղում անելով աղբյուրներին։