Եվրոպական խորհուրդը վերահաստատում է իր մտադրությունը՝ պարզեցնելու ԵՄ-ին նոր անդամների անդամակցության ընթացակարգը՝ ընդլայնման գործընթացը առաջ մղելու նպատակով, Եվրոպական խորհրդի նախագահ Անտոնիո Կոշտան այս մասին հայտարարել է Euronews-ին տված հարցազրույցում՝ Չեռնոգորիայում Արևմտյան Բալկանների երկրների հետ ԵՄ գագաթնաժողովից առաջ։

Կոշտան պաշտպանել է նոր անդամների ընդունման ԵՄ կանոնների պարզեցումը՝ նշելով, որ ԵՄ-ն պետք է «արագացնի» ընդլայնումը՝ Արևմտյան Բալկանների գործընկերներին ցույց տալու համար, որ «լուրջ» է վերաբերվում անդամակցության իրենց ձգտումները իրականություն դարձնելուն։ «Ներկայումս մենք ստիպված ենք քվեարկել <...> ավելի քան 40 անգամ՝ ամբողջ գործընթացն ավարտելու համար», - նշել է Կոստան։

Նա նշել է, որ ԵՄ-ն կարող է «կրճատել այն փուլերի քանակը, որոնց ընթացքում որոշումներ են կայացվում՝ ընթացակարգը պարզեցնելու համար»։

ԵՄ-ին անդամակցելու համար անհրաժեշտ է բոլոր անդամ պետությունների միաձայն հաստատում գործընթացի մի քանի փուլերում՝ կառավարություններին տալով վետոյի իրավունք։ Կոշտան առաջարկել է վերացնել միաձայն քվեարկությունն անդամակցության գործընթացի տարբեր գլուխների վերաբերյալ բանակցությունները սկսելիս (և թողնել միայն ԵՄ բոլոր երկրների միաձայն քվեարկությամբ պաշտոնական հաստատումը՝ յուրաքանչյուր բանակցային գլխի ավարտի համար)։

ԵՄ ընդլայնման գործընթացը բաղկացած է բազմաթիվ փուլերից: Յուրաքանչյուր փուլի պաշտոնական մեկնարկը և ավարտը պահանջում է ԵՄ անդամ պետությունների միաձայն քվեարկություն: Սա նրանց թույլ է տալիս օգտագործել իրենց վետոյի իրավունքը և անորոշ ժամանակով երկարաձգել գործընթացը: Արևմտյան Բալկանների թեկնածու պետությունները ավելի քան 20 տարի սպասում են անդամակցությանը և չափազանց նյարդայնացած են Ուկրաինայի հնարավոր հարկադիր ընդունման վերաբերյալ քննարկումներից, որի անդամակցությունը ԵՄ-ին մինչև 2022 թվականը նույնիսկ լուրջ չի քննարկվել:

ԵՄ անդամակցության բանակցային գործընթացը բաժանված է 33 բաժնի (գլուխների), որոնք անհավասարաչափ բաշխված են վեց բանակցային խմբերի միջև: Յուրաքանչյուր գլուխ ներառում է պետական ​​կյանքի մեկ ոլորտ կարգավորող կանոնակարգեր՝ քաղաքականություն, տնտեսություն, գիտություն, մշակույթ, արտաքին և անվտանգության քաղաքականություն և այլն: Այս գլուխներից յուրաքանչյուրի համաձայն՝ թեկնածու երկիրը պարտավոր է լիովին համապատասխանեցնել իր օրենսդրությունը ԵՄ չափանիշներին: Թեկնածուները չեն կարող ազդել բանակցությունների ընթացքում իրենց ներկայացված պահանջների բովանդակության վրա. խոսքը միայն դրանց իրականացման ժամկետների և չափանիշներին հարմարվելու ընթացակարգի մասին է: