Միացյալ Թագավորության վարչապետ Քիր Սթարմերը հայտարարել է հրաժարականի մասին:

«ՄԹ իշխող Լեյբորիստական ​​կուսակցության նոր առաջնորդի ընտրությունները կսկսվեն հուլիսի 9-ին։ Ես դրանց չեմ մասնակցի»,- նշել է Սթարմերը։

Սթարմերը հրաժարական է տվել վարչապետի և Լեյբորիստական ​​կուսակցության ղեկավարի պաշտոնից՝ «Դաունինգ սթրիթ 10» հասցեում ելույթ ունենալով։

Նա ասել է, որ պաշտոնավարման ընթացքում կայացրած իր յուրաքանչյուր որոշում կապված է եղել «իմ սիրելի երկիրն առաջին տեղում դնելու» հետ։

Սթարմերը շնորհակալություն է հայտնել իր «հիանալի կնոջը՝ Վիկին», նրան անվանելով «ժայռ»։ Նա նաև ասել է, որ ցանկանում է լինել «լավագույն հայրը, որ կարող է լինել իր գեղեցիկ երեխաների համար, ովքեր իմ հպարտությունն ու ուրախությունն են»։

Հրաժարականի մասին հայտարարելուց հետո նա գրկել է կնոջը՝ Վիկտորիային։ Նրանք գրկախառնվել են «Դաունինգ սթրիթ 10» հասցեի դիմաց ու միասին մտել շենք։

Ամիսներ տեւող քաղաքական ճգնաժամի ֆոնին բրիտանացի գործիչը բազմիցս հայտարարել էր, որ չի հեռանալու վարչապետի պաշտոնից։

Էնդի Բըրնհեմը, ով կարող է փոխարինել Սթարմերին, այսօր կլինի Վեստմինստերում՝ երդվելու որպես Մեյքերֆիլդի պատգամավոր՝ անցյալ շաբաթ միջանկյալ ընտրություններում հաղթանակ տանելուց հետո։ Նա 2017-ից 2026 թվականներին եղել է Մեծ Մանչեսթրի քաղաքապետ, իսկ 2001-ից 2017 թվականներին՝ Լիի պատգամավոր։ Քաղաքապետ դառնալուց առաջ իր խորհրդարանական կարիերայի ընթացքում նա զբաղեցրել է մի շարք կաբինետային պաշտոններ, 2009-ից 2010 թվականներին՝ առողջապահության պետքարտուղարի պաշտոնը Գորդոն Բրաունի օրոք։ Բըրնհեմը կապված է Լեյբորիստական ​​կուսակցության մեղմ ձախական խմբի հետ։ Նա քաղաքականապես իրեն համարում է սոցիալիստ։