Սովորական ցավազրկող դեղահաբը կարող է լուրջ շնչառական խնդիրներ առաջացնել, զգուշացրել է ալերգոլոգ և իմունոլոգ Վլադիմիր Բոլիբոկը Life.ru-ի հետ զրույցում։

«Ոչ ստերոիդային հակաբորբոքային դեղամիջոցների՝ (ինչպիսիք են ցավազրկողները) ասթմայի նման ռեակցիան կապված է գենետիկ նախատրամադրվածության հետ։ Դրանք ընդունող մարդիկ զարգացնում են ախտանիշների մի համալիր, որը հայտնի է որպես ասպիրինի տրիադա», - բացատրել է բժիշկը։

Բժշկի խոսքով՝ այս ազդեցությունը կապված չէ ավանդական իմաստով ալերգիայի հետ։ Դեղամիջոցները խաթարում են արախիդոնաթթվի նյութափոխանակությունը՝ առաջացնելով պարադոքսալ ռեակցիա օրգանիզմում՝ ոչ թե բորբոքման նվազում, այլ դրա կտրուկ աճ։ Սա կարող է հանգեցնել շնչառության դժվարացման, քթի խցանման կամ նույնիսկ անգիոեդեմայի։

Սինդրոմը ամենից հաճախ դրսևորվում է 30-40 տարեկան մեծահասակների, հատկապես կանանց մոտ։ Նրանք, ովքեր կասկածում են, որ ունեն նման ռեակցիա, պետք է հետազոտվեն թոքաբանի, քիթ-կոկորդ-ականջաբանի և ալերգոլոգի կողմից։