Արդեն որոշ ժամանակ է՝ Երևանի սրտում՝ Աբովյան ու Պուշկին փողոցների խաչմերուկում, հայկական ազգային զարդանախշերով ձևավորված հետիոտնային անցում-գորգը հայտնվել է հանրության ուշադրության կենտրոնում։

Գորգը դարձել է քաղաքացիների և զբոսաշրջիկների համար լուսանկարվելու սիրված վայրերից մեկը։

MediaHub-ի տեղեկություններով՝ Երևանի այլ փողոցներում ևս կհայտնվեն նախշազարդված այլ հետիոտնային անցումներ։

MediaHub-ը դիմեց Երևանի քաղաքապետարան հասկանալու՝ ո՞ր փողոցներում կլինեն նման հետիոտնային անցումներ։

Երևանի քաղաքապետարանից հաստատեցին մեր տեղեկությունը։

«Այո, ևս 2 նախագիծ կա, մեկը լինելու է Արամի փողոցում, մյուսը՝ Կողբացի»,- հայտնեցին Երևանի քաղաքապետարանից։

Հիշեցնենք, որ օրերս գրել էինք, որ վերջին շրջանում Աբովյան ու Պուշկին փողոցների խաչմերուկում գորգի ձևով հետիոտնային անցումը գրեթե չէր երևում և նույնիսկ դժվար էր նմանեցնել հետիոտնային անցման։

MediaHub-ը դիմել էր Երևանի քաղաքապետարան՝ պարզելու, թե արդյո՞ք նախատեսվում է վերականգնել և կրկին գունազարդել անցում-գորգը։

Երևանի քաղաքապետարանից MediaHub-ին հայտնել էին, որ անցումը չի մաքրվել, այլ ժամանակի ընթացքում խամրել էր։ Քաղաքապետարանի փոխանցմամբ՝ համապատասխան աշխատանքներ են իրականացվել, այդ թվում մաքրման, ինչի արդյունքում անցումն այժմ պատշաճ տեսք ունի։

Մարիաննա Արամյան