Սեռական հանցագործությունների համար մեղադրվող ֆինանսիստ Ջեֆրի Էպշտեյնին ազատություն են առաջարկել ԱՄՆ գործող նախագահ Դոնալդ Թրամփի դեմ ցուցմունք տալու դիմաց, հայտնել է «Նյու Յորք Փոստ»-ը (NYP)՝ հղում անելով մահացած գործարարի խցակից, նախկին ոստիկան Նիկոլաս Տարտալյոնեին։

NYP-ի (The New York Post) աղբյուրի համաձայն՝ Էպշտեյնն այս առաջարկը ստացել է ԱՄՆ դաշնային դատախազներից։ Տարտալյոնեն ֆինանսիստի հետ խուց է կիսել Մանհեթենի «Մետրոպոլիտեն» ուղղիչ կենտրոնում, որտեղ Էպշտեյնը տեղափոխվել է 2019 թվականին՝ անչափահասների սեռական շահագործման մեղադրանքով երկրորդ անգամ ձերբակալվելուց հետո։

NYP-ն մեջբերել է հուլիսին Տարտալյոնեի կողմից ներկայացված ներման դիմումից մի հատված։ Էպշտեյնին առաջարկվել է ցուցմունք տալ ֆինանսիստի սեփական հանցագործություններին Թրամփի մասնակցության մասին։ Այս ցուցմունքը, գրել է նախկին ոստիկանը, թույլ կտար Էպշտեյնին մնալ ազատության մեջ՝ դաշնային դատախազների հետ մեղքի ընդունման համաձայնագիր կնքելով։

«Էպշտեյնն ինձ ասաց, որ [գլխավոր դատախազ] Մորին Քոմին իրեն ասել է, որ նա պարտավոր չէ ոչինչ ապացուցել, մինչև նախագահ Թրամփի մարդիկ չկարողանան հերքել այն»,- գրել է նախկին ոստիկանը։

Փաստաթղթերում չի նշվել, թե ինչ հանցագործությունների համար է կասկածվում Թրամփը։

Էպշտեյնը ձերբակալվել է Միացյալ Նահանգներում 2019 թվականի ամռանը և մեղադրվել է աղջիկների, այդ թվում՝ 14-ամյա աղջիկների, առևտրի և նրանց մարմնավաճառության համար դրդման մեջ։ Այդ տարվա օգոստոսին 66-ամյա միլիարդատերը ինքնասպան է եղել բանտում՝ դատավարությունից առաջ։

Այն ժամանակ, երբ մեղադրողները, ենթադրաբար, խնդրել են Էպշտեյնին ցուցմունք տալ Թրամփի դեմ, վերջինս եղել է իր առաջին նախագահական ժամկետում։ Տարտալյոնեի խոսքով՝ ֆինանսիստն ինքը նրան ասել է, որ Թրամփը ներգրավված չէ նրա հանցագործություններում։

Թրամփը և Էպշտեյնը ճանաչել են միմյանց 1980-ականների սկզբից, երբ նրանք ապրում են Ֆլորիդայում՝ հարևանությամբ։ Նրանք հաճախ են միասին հայտնվել հանրության մեջ։ Թրամփը բազմիցս թռչել է Էպշտեյնի ինքնաթիռով։ Ինքը՝ ամերիկացի առաջնորդը, բազմիցս հերքել է ֆինանսիստի հետ որևէ բարեկամություն կամ կապ։