ԱՄՆ կոնգրեսական Բրեդ Շերմանը պահանջել է, որ Ադրբեջանն անհապաղ ազատ արձակի բոլոր հայ բանտարկյալներին։

Շերմանն ընդգծել է հայ գերիներին գնդակահարելու դեպքերը, որոնց կադրերը տարածվել էին համացանցում։ «Հաշվի առնելով սա՝ կարևոր է, որ Միացյալ Նահանգները պահանջի, որ Բաքուն անհապաղ ազատ արձակի բոլոր հայ բանտարկյալներին»,- ասել է նա Ներկայացուցիչների պալատի արտաքին հարաբերությունների հանձնաժողովին։ Առաջարկը պաշտպանել է նաև հանձնաժողովի նախագահ Բրայան Մաստը։

Բրեդ Շերմանը նաև նշել է Բաքվի ռազմական ագրեսիան Լեռնային Ղարաբաղում և 100 000-ից ավելի հայերի էթնիկ զտումը այն տարածաշրջանից, որտեղ նրանք ապրել են ավելի քան 2000 տարի։

ԱՄՆ կոնգրեսական Բրեդ Շերմանը առաջարկել է «Արտաքին ծառայության մասին» օրենքում (H.R. 9086) փոփոխություն, որը կոչ է անում Ադրբեջանին անհապաղ և անվերապահորեն ազատ արձակել բոլոր հայ ռազմագերիներին և քաղբանտարկյալներին։

Ամերիկայի Հայ Դատի հանձնախումբը ողջունել է Ներկայացուցիչների պալատի հանձնաժողովի որոշումը։

Սպասվում է փոփոխության վերաբերյալ անվանական քվեարկություն։ Եթե այն ընդունվի, օրինագիծը կուղարկվի Ներկայացուցիչների պալատի նիստ։

«Մենք ողջունում ենք նախագահ Մաստի աջակցությունը Շերմանի առաջարկին և հանձնաժողովի միաձայն դիրքորոշումը, որ այս պատանդները պետք է անհապաղ և անվերապահորեն ազատ արձակվեն», - ասել է ANCA-ի գործադիր տնօրեն Արամ Համբարյանը։