Ուկրաինայի նախագահ Վլադիմիր Զելենսկու աշխատակազմի նախկին ղեկավար Անդրեյ Երմակը դատարանում հայտարարել է, որ չունի գրավի համար անհրաժեշտ 180 միլիոն գրիվնա (4 միլիոն դոլար): 

Լսումների միջև ընդմիջման ժամանակ Երմակը լրատվամիջոցների հետ զրույցում ասել է, որ «հաստատ այդպիսի գումար չունի»։

«Ես ունեմ միայն այն, ինչ գրանցված է իմ հայտարարագրում», - նշել է նախագահի աշխատակազմի նախկին ղեկավարը։

«180 միլիոնը միլիոններ են։ Դա, հավանաբար, կանխիկով լի ջիպ է։ Գրավը պետք է որոշվի անձի ֆինանսական հնարավորությունների հիման վրա, այլ ոչ թե որպես պատիժ», - ասել է փաստաբան Իգոր Ֆոմինը։

Մայիսի 11-ի երեկոյան Ուկրաինայի ազգային հակակոռուպցիոն բյուրոյի քննիչները և մասնագիտացված հակակոռուպցիոն դատախազության դատախազները կասկածի մասին ծանուցում են ուղարկել նախագահի աշխատակազմի նախկին ղեկավար Անդրեյ Երմակի դեմ՝ Կիեւի մոտ Կոզինում բնակելի շենքերի կառուցման գործով։

Քննիչների տվյալներով՝ բնակարանային կոոպերատիվը, որտեղ տեղակայված է Երմակի տունը, կառուցվել է նախկին փոխվարչապետ Ալեքսեյ Չեռնիշովի հետ կապված ընկերությունների կողմից։ Իրավապահ մարմինների աշխատակիցները կարծում են, որ շինարարությունը ֆինանսավորվել է գործարար Թիմուր Մինդիչի գլխավորած խմբի կողմից ենթադրաբար լվացված միջոցներով։ Քննիչները նաև պնդում են, որ Երմակը ներգրավված է այս սխեմայում։

Նախորդ օրը Բարձրագույն հակակոռուպցիոն դատարանը պետք է որոշեր Երմակի նախնական կալանքը։ Մեղադրանքը միջնորդել էր կա՛մ նախնական կալանք, կա՛մ 180 միլիոն գրիվնա գրավի համար։ Նրա փաստաբանները խնդրել էին հետաձգել նիստը՝ գործի նյութերի 16 հատորները վերանայելու համար։