Մի շարք ԶԼՄ-ներ հրապարակել են Իրանի համար ԱՄՆ խաղաղության ծրագրի 15 կետերը։ Այն, ի թիվս այլ բաների, ներառում է պատժամիջոցների վերացում և միջուկային նախագծին օգնություն, չնայած իրանական կողմը հերքում է բանակցությունների մասին տեղեկությունները։

Պակիստանը որպես միջնորդ է հանդես եկել ծրագրի ներկայացման գործում։ Ծրագիրը վերաբերում է Իսլամական Հանրապետության հրթիռային և միջուկային ծրագրերին, ինչպես նաև նավարկության ազատությանը։

Սպիտակ տունն առաջարկում է Իրանի դեմ բոլոր պատժամիջոցների վերացում ու դրանց վերահաստատման սպառնալիքի վերացում, եթե Թեհրանը կատարի խաղաղության ծրագրի պայմանները։

Վաշինգտոնը պատրաստ է օգնություն ցուցաբերել Բուշերի քաղաքացիական միջուկային նախագծի առաջխաղացման մեջ՝ էլեկտրաէներգիայի արտադրության համար։

ԱՄՆ-ն և տարածաշրջանային միջնորդների խումբը քննարկում են Իրանի հետ բարձր մակարդակի խաղաղության բանակցություններ անցկացնելու հնարավորությունը արդեն հինգշաբթի՝ մարտի 26-ին, սակայն դեռևս սպասում են Թեհրանի պատասխանին։

Թրամփի վարչակազմը պահանջում է, որ Թեհրանը սառեցնի իր միջուկային ծրագիրը, սահմանափակի դրա օգտագործումը քաղաքացիական կամ պաշտպանական նպատակներով, դադարեցնի առկա միջուկային հզորությունների զարգացումն ու դադարեցնի ուրանի հարստացման կարողությունների ընդլայնումը։

Իրանը պետք է ապամոնտաժի իր առկա միջուկային կարողությունները։ Իրանը պետք է պարտավորվի երբեք չձգտել միջուկային զենքի։ Իրանի տարածքում ուրանի հարստացում չի լինի։

Հարստացված ուրանը կմնա հսկողության տակ և համաձայնեցված քանակությամբ, և կներդրվեն միջազգային մոնիթորինգի մեխանիզմներ, այդ թվում՝ ԱԷՄԳ-ի հսկողության ներքո։ ԱՄՆ-ն պահանջում է, որ Իրանը Ատոմային էներգիայի միջազգային գործակալությանը հանձնի իր մոտ 450 կիլոգրամ ուրանի պաշարները, որոնք հարստացված են մինչև 60 տոկոս։

Նատանզի, Սպահանի և Ֆորդոյի միջուկային օբյեկտները կհանվեն շահագործումից ու կոչնչացվեն։ Հրթիռային ծրագիրը կքննարկվի ավելի ուշ փուլում՝ դրա քանակի և հեռահարության սահմանափակումներով։

ԱՄՆ-ն պահանջում է Հորմուզի նեղուցի ապաշրջափակում և դրա՝ որպես ազատ ծովային գոտու կարգավիճակի պահպանում, ինչպես նաև Իրանի կողմից Մերձավոր Արևելքում պրոքսի խմբերի ֆինանսավորման դադարեցում։