Հունգարիան ու Սլովակիան մտադիր են բողոքարկել 2027 թվականից Ռուսաստանից գազի գնումները արգելելու որոշումը Եվրոպական դատարանում։

Սլովակիան դեմ է արտահայտվել որոշմանը ԵՄ համապատասխան նիստում, սակայն այս դիրքորոշումը բավարար ձայներ չի ստացել, հետևաբար,Բրատիսլավան որոշել է բողոքարկել, ասել է Սլովակիայի արտաքին գործերի նախարար Յուրայ Բլանարին։

«Մենք չենք կարող որոշումներ կայացնել, որոնք չեն արտացոլում առանձին երկրների իրական հնարավորությունները և առանձնահատկությունները։ Ահա թե ինչու մենք կդիմենք Եվրոպական Միության դատարան և կսկսենք վարույթ՝ ռուսական էներգակիրների ներմուծումն արգելող ԵՄ կանոնակարգը չեղյալ համարելու համար», - գրել է նա Ֆեյսբուքում։

Հունգարիան  Եվրոպական հանձնաժողովի` Ռուսաստանից գազի ներմուծումն արգելելու որոշումը համարում է խարդախություն, քանի որ այն ընդունվել է առանց ԵՄ անդամ պետությունների միաձայնության, հայտարարել է Հունգարիայի արտաքին գործերի նախարար Պետեր Սիյարտոն։ «Հենց որ այս որոշումը պաշտոնապես հրապարակվի, Հունգարիայի կառավարությունը հայց կներկայացնի ԵՄ դատարան՝ նպատակ ունենալով դատարանին չեղյալ հայտարարել այս միջոցառումը», - ասել է Սիյարտոն։

Այսօր ԵՄ խորհուրդը հաստատել է ԵՄ-ին ռուսական հեղուկացված բնական գազի մատակարարման լիակատար արգելքը 2027 թվականի հունվարի 1-ից, իսկ խողովակաշարային գազի մատակարարման արգելքը՝ 2027 թվականի սեպտեմբերի 30-ից։ Սլովակիան ու Հունգարիան դեմ են եղել Ռուսաստանի հետ էներգետիկ բաժանման համաձայնագրին, սակայն արգելքը նախատեսված է եղել մեծամասնության հաստատման համար՝ հաղթահարելով Բուդապեշտի և Բրատիսլավայի առարկությունները։