«Ժողովուրդ» օրաթերթը գրում է.

«ՄԻԵԴ-ում հայ գերիների շահերի ներկայացուցիչ Սիրանույշ Սահակյանը ArmLur.am-ի հետ զրույցում անդրադարձել է մայիսի 26-ին Բաքվի վերաքննիչ դատարանում տեղի ունեցած նիստին, որտեղ քննվել են հայ գերիների, այդ թվում՝ Արցախի ռազմաքաղաքական ղեկավարության գործերով ներկայացված բողոքները։

Սահակյանի խոսքով՝ Ռուբեն Վարդանյանի գործը վերաքննիչ ատյանում չի քննվելու, քանի որ նա դեռ սկզբնական փուլում հրաժարվել էր բողոքարկումից՝ այն համարելով անարդյունավետ։

Նա նշել է, որ գործով ձևավորվել է նոր դատական կազմ, իսկ կողմերը սահմանափակվել են ինքնությունների ճշտմամբ։ Ըստ Սահակյանի՝ դատարանը որոշել է շարունակել քննությունը՝ առանց լրացուցիչ ապացույցների ուսումնասիրման, ինչի արդյունքում վերաքննիչ գործընթացը ծավալային առումով գրեթե չի տարբերվելու առաջին ատյանի դատավարությունից։ Հաջորդ նիստը նշանակվել է հունիսի 2-ին։

Սիրանույշ Սահակյանի գնահատմամբ՝ դատավարություններից արդարացման կամ պատժի մեղմացման ակնկալիքներ չկան։ Նրա խոսքով՝ գործընթացը հիմնականում ծառայում է Ադրբեջանի ներքին քարոզչական և հակահայկական օրակարգին։

Անդրադառնալով սոցիալական ցանցերում տարածված տեղեկություններին, թե իբր Ռուբեն Վարդանյանը կարող է ազատ արձակվել, Սահակյանը նշել է, որ նման տեղեկություններ իրենք չունեն։ Ըստ նրա՝ հակառակը՝ շրջանառվում են իրականությանը չհամապատասխանող և, հավանաբար, պետական մակարդակով ուղղորդվող տեղեկություններ, այդ թվում՝ Վարդանյանին Ուկրաինա արտահանձնելու հնարավորության վերաբերյալ։

Նա հիշեցրել է, որ վերջերս հրապարակվել է փաստաբանների միջազգային հանձնաժողովի զեկույցը՝ Ադրբեջանի դատավարությունների վերաբերյալ, որտեղ առանձնահատուկ ուշադրություն է դարձվել նաև Ռուբեն Վարդանյանի գործին։ Զեկույցում արձանագրվել է, որ դատավարությունը չի համապատասխանում միջազգային չափանիշներին, իսկ դատավորների և փաստաբանների անկախությունը լուրջ կասկածների տակ է դրված։ Սահակյանի կարծիքով՝ ադրբեջանական իշխանությունները ցավագին են ընդունել այդ գնահատականները և այժմ փորձում են հակաքարոզչական արշավ իրականացնել՝ Վարդանյանի անունը կապելով Ուկրաինայի հետ։

Հիշեցնենք, որ Արցախի ռազմաքաղաքական ղեկավարությունը Բաքվում մեղադրվում է ահաբեկչական գործողություններ ծրագրելու և իրականացնելու, ինչպես նաև մարդկության դեմ ուղղված հանցագործությունների մեջ։ Ռուբեն Վարդանյանին, ի թիվս վերոնշյալ մեղադրանքների, վերագրվում է նաև այդ գործողությունների ֆինանսավորումը»։

«Հրապարակ»․ թերթը գրում է․ 

Մայիսի 25-ին Գյումրիում ՝ Շիրակի մարզում քարոզարշավից հետո հանրահավաքի համար ՔՊ-ն տիտանական ջանքեր է գործադրել, որպեսզի չկրկնվի նախորդ անհաջող փորձը։

Մեզ պատմեցին, որ վարչական տեռորի են ենթարկվել համայնքային նշանակության բոլոր կառույցների աշխատակիցները, որոնց պարտադրել են մեկ մարդու պես ներկա գտնվել Վարդանանց հրապարակում: Մեծ թվով մարդիկ բերվել են Երեւանից, որոնց մեկ-երկու ժամ առաջ ազատել են աշխատանքից, որ Գյումրի մեկնեն:

Բայց հատկապես մեծ թիվ են կազմել Շիրակի մարզի այլ համայնքներից բերվածներն ու Գյումրուն հարակից զորամասերի զինծառայողները, որոնց մի մասին ասվել է՝ քաղաքացիական հագուստով եկեք հանրահավաքի։

 
Ասում են՝ Վարդանանց հրապարակում լավագույն դեպքում 200-300 գյումրեցի է եղել, մնացածները եկվորներ են եղել, որոնցով իշխանությունը փորձել է տպավորիչ, մարդաշատ հանրահավաքի տպավորություն թողնել։

«Ժողովուրդ» օրաթերթը գրում է.

««Ժողովուրդ»-ի բացառիկ տեղեկություններով՝ Աննա Հակոբյանը քարոզարշավի վերջին օրը կմիանա Նիկոլ Փաշինյանին։

Վարչապետ Նիկոլ Փաշինյանի կինը՝ Աննա Հակոբյանը, որը քարոզարշավի ընթացքում մինչ այս չի ուղեկցել ամուսնուն հանրային հանդիպումներին, իր շրջապատում հայտնել է, որ քարոզարշավի վերջին օրը ընտանիքը միասնական կհայտնվի բեմում։

«Ժողովուրդ» օրաթերթի տեղեկություններով՝ այդ օրը Աննա Հակոբյանը երեխաների հետ կկանգնի Փաշինյանի կողքին՝ ընդգծելով ընտանիքի աջակցությունը ընտրարշավի եզրափակիչ փուլում»։