Կանադական Բրիտանական Կոլումբիա նահանգի իշխանությունները արտակարգ դրություն են հայտարարել արագ տարածվող անտառային հրդեհի պատճառով: Մոտ 22,000 մարդ տարհանվել է, իսկ ևս 9,700-ին զգուշացվել է պատրաստ լինել լքել իրենց տները։

Associated Press-ը հայտնում է, որ նահանգային իշխանությունները արտակարգ դրություն են հայտարարել ավելի քան 100 անտառային հրդեհների պատճառով, որոնցից գրեթե կեսը դեռևս չեն վերահսկվում: Շոգը, ուժեղ քամիները և երկարատև երաշտը սրում են իրավիճակը։

Մոտ 12,000 բնակչություն ունեցող Սամերլենդ քաղաքը լիովին տարհանվել է, ինչպես նաև Փիչլենդի և հարակից տարածքների մոտ 8,000 բնակիչներ: Հաղորդվում է, որ մի քանի տներ այրվել են, բայց ճշգրիտ թիվը դեռևս պարզված չէ։

Ուրբաթ երեկոյան սկսված Բալդ Ռեյնջ հրդեհը մի քանի ժամվա ընթացքում տարածվել է մոտ 50 քառակուսի կիլոմետրի վրա և հասել Սամերլենդ՝ անցնելով մոտ 15 կիլոմետր: Հրշեջ ծառայության մի պաշտոնյա իրավիճակը բնութագրել է որպես «պայթյունավտանգ»՝ համեմատելով հրդեհի տարածումը ռումբի հետ։

Փրկարարները տարհանել են արգելափակված մարդկանց, այդ թվում՝ ուղղաթիռով։ Իշխանությունները զգուշացրել են, որ վտանգավոր եղանակային պայմանները կարող են նմանատիպ իրավիճակների հանգեցնել նահանգի այլ շրջաններում։