Պենտագոնի բարձրաստիճան պաշտոնյայի կողմից չորեքշաբթի օրը օրենսդիրներին տրված Իրանի պատերազմի ընդհանուր արժեքի 25 միլիարդ դոլարի գնահատականը ցածր թիվ է, որը չի ներառում տարածաշրջանում ԱՄՆ բազաների կրած լայնածավալ վնասի վերականգնման ծախսերը, CNN-ին ասել են թեմային ծանոթ երեք անձինք։

Աղբյուրներից մեկը նշել է, որ իրական արժեքը մոտ է 40-50 միլիարդ դոլարի, երբ հաշվի են առնվում ԱՄՆ ռազմական օբյեկտների վերականգնման ու ոչնչացված ակտիվների փոխարինման ծախսերը։

Պատերազմի սկզբնական օրերին Պարսից ծոցում Իրանի հարվածները զգալիորեն վնասել են առնվազն 9 ամերիկյան ռազմական օբյեկտ ընդամենը 48 ժամվա ընթացքում` թիրախավորելով Բահրեյնում, Քուվեյթում, Իրաքում, Արաբական Միացյալ Էմիրություններում և Կատարի օբյեկտներ։

CNN-ը հաղորդել է, որ Մերձավոր Արևելքում մի քանի կարևորագույն ամերիկյան ռադարային համակարգեր և այլ սարքավորումներ նույնպես, ըստ երևույթին, ոչնչացվել են Իրանի հարվածների հետևանքով, այդ թվում՝ Հորդանանում տեղակայված ամերիկյան THAAD հրթիռային մարտկոցի ռադարային համակարգը և Արաբական Միացյալ Էմիրությունների երկու վայրերում նմանատիպ ռադարային համակարգեր պարունակող շենքերը։ Սաուդյան Արաբիայում ռազմաբազայի վրա Իրանի հարվածի հետևանքով ոչնչացվել է նաև ԱՄՆ Ռազմաօդային ուժերի «E-3 Sentry» ինքնաթիռ։

Ջուլս «Ջեյ» Հերսթ III-ը, որն աշխատում է որպես գործակալության վերահսկիչ, չորեքշաբթի օրը Ներկայացուցիչների պալատի զինված ուժերի հանձնաժողովին ասել է, որ իր նշած 25 միլիարդ դոլարի «մեծ մասը» ծախսվել է զինամթերքի վրա, իսկ պատերազմի նախարար Փիթ Հեգսեթը հրաժարվել է ասել, թե արդյոք այդ գումարը ներառում է ամերիկյան բազաներին հասցված վնասի վերականգնումը։

CNN-ը մեկնաբանություն է խնդրել Պենտագոնից։

Դեմոկրատ ներկայացուցիչ Ռո Խաննան կասկածանքով է մոտեցել 25 միլիարդ դոլարի գնահատականին՝ այն անվանելով «լիովին սխալ» չորեքշաբթի օրվա լսումների ժամանակ։ CNN-ը հաղորդել է, որ Պենտագոնի պաշտոնյաները նախկինում Կոնգրեսին հայտնել էին, որ պատերազմը միայն առաջին վեց օրերի ընթացքում արժեցել է մոտ 11 միլիարդ դոլար, իսկ նախարարությունը անցյալ ամիս խնդրել էր Սպիտակ տանը հաստատել Կոնգրեսին ուղղված հարցումը՝ շարունակվող պատերազմի համար ավելի քան 200 միլիարդ դոլարի լրացուցիչ ռազմական ֆինանսավորման համար։

Անցյալ շաբաթ լրագրողների համար բյուջետային ճեպազրույցների ժամանակ Հըրսթն ասել էր, որ Պենտագոնը «չունի վերջնական թիվ այն մասին, թե որքան վնաս է հասցվել մեր արտերկրում գտնվող օբյեկտներին», և դա կախված է «նրանից, թե ինչպես ենք մենք որոշում վերականգնել դրանք, կամ արդյոք դա կանենք»։ Նա նշել էր, որ այդ օբյեկտների վերանորոգման արժեքը «չի արտացոլվում» Պենտագոնի՝ 2027 թվականի ֆինանսական տարվա 1.5 տրիլիոն դոլարի բյուջեի հայտում, մասամբ այն պատճառով, որ գերատեսչությունը դեռևս գնահատում է, թե «ինչ ենք մենք ուզում կառուցել ապագայում»։

«Մեր գործընկերները նույնպես կարող են իրենց մասնաբաժինը ներդնել այդ շինարարության մեջ», - ասել էր Հըրսթը: «Այսպիսով, մենք լավ գնահատական ​​չունենք այն մասին, թե որքան կպահանջվի այդ օբյեկտների վերականգնման համար»։

Պաշտոնյաները անցյալ շաբաթ հայտարարել էին, որ 2027 թվականի համար պահանջվող 1.5 տրիլիոն դոլարի բյուջեն Պատերազմի նախարարության ֆինանսավորման 42%-ով աճ կլինի։