Լեհաստանը դարձել է առաջին երկիրը, որը ստեղծել է կառավարական հանձնաժողով՝ Լեհաստանի քաղաքացիների և սկանդալային միլիարդատեր Ջեֆֆրի Էպշտեյնի մտերիմների միջև հնարավոր կապերը հետաքննելու համար, հաղորդել է Rzeczpospolita-ն։

Լեհաստանի վարչապետ Դոնալդ Տուսկը հրամանագիրը ստորագրել է ԱՄՆ-ում Էպշտեյնին վերաբերող նոր փաստաթղթերի հրապարակումից հետո։

Հանձնաժողովը կհետաքննի ԱՄՆ դատարանների և լրատվամիջոցների հաղորդագրություններում հիշատակված Լեհաստանի քաղաքացիների և Էպշտեյնի շրջապատի անձանց միջև հնարավոր շփումների մասին տեղեկությունները: Հատուկ ուշադրություն է դարձվելու մոդելային արդյունաբերության հետ կապված միջադեպերին:

ԱՄՆ Արդարադատության նախարարության փաստաթղթերի համաձայն՝ երիտասարդ կանայք կարող էին հավաքագրվել Արևելյան Եվրոպայի, այդ թվում՝ Լեհաստանի մոդելային գործակալությունների միջոցով՝ արտասահմանյան ուղևորությունների համար։

Հրապարակված նյութերում դեռևս չեն նշվել լեհ քաղաքական գործիչների կամ գործարարների կոնկրետ անուններ: