«Հրապարակ» թերթը գրում է. «Նոր Հաճնում դեկտեմբերի 13-ի ընտրություններում հայտ ներկայացրած «Գործարար» կուսակցության 29 թեկնածուից 3-ն ինքնաբացարկի դիմում են ներկայացրել:
Պատմեցին, որ առաջադրվելուց հետո իմացել են, որ «Գործարարը» պրոիշխանական է, փոշմանել են, դուրս եկել պայքարից: Հնարավոր է, որ եւս 2 թեկնածու ինքնաբացարկ ներկայացնի: «Գործարարի» համայնքապետի թեկնածու Վարդան Պապյանին հարցրինք՝ ինչո՞ւ են իրենց թեկնածուներն ինքնաբացարկ նեկայացրել։
«Տեղեկությունը կճշտենք, տեսնենք` ովքեր են, եթե ինքնաբացարկ անող էլ լինի, մենք հաշտ ենք դրա հետ: Դե, երեւի որոշել են չպայքարել: Կեղտոտ խաղեր են խաղում, մարդիկ կան, որ ուզում են անձնականացնեն ընտրությունները ու հարազատների մեջ խժդժություն են գցում: Դրա հետ կապված կարող են լինել 1 կամ 2 հոգի, կեղծ լուրեր են տարածում:
Մի քանի հոգու ընտանիքում միտումնավոր խնդիրներ են առաջացրել, բայց ովքեր էլ որ իրենց մեջ ուժ կգտնեն՝ կհասկանան, որ ընդհանուրի շահն իրենց հարաբերություններից կարեւոր է: Մանիպուլյացիաներ են անում, որ խանգարեն եւ խաթարեն, բայց չի ստացվելու»: Թիվ 28 ԸԸՀ նախագահը հաստատեց, որ 3 դիմում են ստացել»։
«Ժողովուրդ» օրաթերթը գրում է. ««Ժողովուրդ» օրաթերթի բացառիկ տեղեկություններով՝ հոկտեմբերի 1-ին Ազգային ժողովում պատգամավորների մասնակցությամբ տեղի ունեցած ծեծկռտուքի առնչությամբ նախաձեռնված քրեական վարույթի շրջանակում իրավապահները ուսումնասիրում են միջադեպի տեսագրությունները՝ պարզելու, թե իրականում ով է սկսել բախումը, ով է առաջինը ձեռք բարձրացրել որևէ մեկի վրա և ինչ հանգամանքներում է իրավիճակը վերածվել ծեծկռտուքի։
Մեր տեղեկություններով՝ այս պահին իշխանական շրջանակների ուշադրության կենտրոնում հատկապես «Ուժեղ Հայաստան» խմբակցության պատգամավոր Գառնիկ Դավթյանն է։ Մինչդեռ վերջինիս պաշտպանական կողմը պատրաստվում է քրեական վարույթի շրջանակում ներկայացնել իր հակափաստարկներն ու տեսագրությունները՝ պնդելով, որ միջադեպի հրահրողը ՔՊ խմբակցության պատգամավոր Տարոն Չախոյանն է եղել։
Մասնավորապես, ընդդիմադիր կողմի ներկայացմամբ՝ տեսանյութերում հստակ երևում է, որ ամեն ինչ սկսվել է այն բանից հետո, երբ Տարոն Չախոյանը ամբիոնի մոտից վիրավորական և սեռական բնույթի հայհոյանքներ է հնչեցրել ընդդիմության առաջնորդների հասցեին՝ «…ձեր առաջնորդի վրա»։
Դրանից հետո, ըստ այդ վարկածի, Գառնիկ Դավթյանը մոտեցել է Չախոյանին, ով ջուրը շփել է Դավթյանի ուղղությամբ, որից հետո ընդդիմադիր պատգամավորը հարվածել է Չախոյանին։
Մեր տեղեկություններով՝ Գառնիկ Դավթյանի պաշտպանական կողմը պատրաստվում է այս հանգամանքները և տեսագրությունները ներկայացնել վարույթն իրականացնող մարմնին՝ հիմնավորելու, որ միջադեպի նախնական հրահրումը եղել է ոչ թե Դավթյանի, այլ ՔՊ պատգամավորի գործողությունների հետևանքով։
Սակայն պատմությունը միայն այս դրվագով չի սահմանափակվում։ «Ժողովուրդ» օրաթերթի տեղեկություններով՝ քրեական վարույթի շրջանակում պետք է հստակեցվի նաև Տարոն Չախոյանի մասնակցությունը մեկ այլ բախման։ Խոսքը այն դրվագի մասին է, երբ, ըստ տեսագրությունների վերաբերյալ ընդդիմադիր կողմի մեկնաբանության, Չախոյանը մի քանի անձանց շրջանցելով մոտեցել է Նարեկ Կարապետյանին և հարվածել նրա ճակատին։
Հենց այս դրվագով էլ ընդդիմադիրները փորձում են հիմնավորել, որ ծեծկռտուքի ընթացքում բռնություն կիրառել է նաև ՔՊ պատգամավորը։ Նրանց մատնանշած կադրերում երևում է նաև Նարեկ Կարապետյանի ճակատի կարմրած հատվածը։
Այսպիսով՝ հոկտեմբերի 1-ի հրապարակային միջադեպի շուրջ ձևավորվել է երկու հակադիր վարկած։ Իշխանական կողմի ուշադրության կենտրոնում Գառնիկ Դավթյանի գործողություններն են, իսկ ընդդիմադիրները պնդում են, որ բախման սկիզբը դրել է Տարոն Չախոյանը՝ վիրավորանքներ հնչեցնելով և հետագայում նաև ֆիզիկական ուժ կիրառելով։
Թե կողմերից որի ներկայացրած վարկածն է համապատասխանում իրականությանը, պետք է պարզվի քրեական վարույթի շրջանակում՝ տեսագրությունների, մասնակիցների ցուցմունքների և մյուս ապացույցների համադրմամբ»։

Русский