Կոլումբիայի նախագահ Գուստավո Պետրոն հայտարարել է, որ չի ճանաչում նախագահական ընտրությունների նախնական ձայների հաշվարկը և կսպասի, որ ընտրական հանձնաժողովները ավարտեն արձանագրությունների մշակումը։

«Որպես նախագահ, ես չեմ ճանաչում Բաուտիստա եղբայրների մասնավոր ընկերության նախնական արդյունքները, քանի որ, չնայած ձայների հաշվարկման և ստուգման ծրագրային ապահովման ալգորիթմներն անփոփոխ թողնելու պահանջին, դրանք վերջին շաբաթվա ընթացքում երեք անգամ փոփոխվել են՝ ավելացնելով պաշտոնական ընտրական ցուցակում չընդգրկված անձանց 800,000 նույնականացման համարներ», - գրել է Պետրոն X-ում։

Ըստ Պետրոյի՝ այս ձայների հաշվարկը չի կարող համարվել իրավաբանորեն պարտադիր։ «Հետևաբար, օրենքի համաձայն, իրավաբանորեն պարտադիր արդյունքները, որոնք ես՝ որպես նախագահ, կընդունեմ ու կճանաչեմ, դատավորների նախագահությամբ հաշվարկող հանձնաժողովների կողմից հայտարարված արդյունքներն են», - հավելել է նա։

Կոլումբիայում նախագահական ընտրությունները տեղի են ունեցել մայիսի 31-ին: Քաղաքացիական կացության ազգային ռեգիստրի կայքում հրապարակված նախնական քվեների հաշվարկի համաձայն՝ ծայրահեղ աջ քաղաքական գործիչ և գործարար Աբելարդո դե լա Էսպրիելան (43.74%) և իշխող ձախակողմյան «Պատմական պայմանագիր» կուսակցության թեկնածու Իվան Սեպեդան (40.90%) առաջատարներ են դարձել: Այս արդյունքները նրանց դուրս են բերում երկրորդ փուլ, որը տեղի կունենա հունիսի 21-ին: