Թեհրանը որևէ զիջում չի պահանջել Վաշինգտոնից, ասել է Իրանի արտաքին գործերի նախարարության խոսնակ Էսմայիլ Բաղային։

«Մենք որևէ զիջում չենք պահանջել ԱՄՆ-ից։ Ընդհակառակը, մենք կոչ արեցինք դադարեցնել պատերազմը և իրանական նավերի դեմ ծովահենությունը», - հայտարարել է Բաղային։

Նրա խոսքով՝ առաջարկներն ԱՄՆ-ին առատաձեռն և պատասխանատու են եղել։

«Մեր պահանջները օրինական են. պատերազմի ավարտ, շրջափակման վերացում, ծովային ծովահենության դադարեցում և Իրանի ակտիվների ապասառեցում, որոնք անարդարացիորեն սառեցվել էին բանկերում ԱՄՆ-ի ճնշման տակ։ Իրանի մյուս պահանջների թվում էին Հորմուզի նեղուցով անվտանգ անցումը և տարածաշրջանում ու Լիբանանում անվտանգության հաստատումը. սա տարածաշրջանային անվտանգությունն ապահովելու առատաձեռն և օրինական առաջարկ է։ Ցավոք, Ամերիկան ​​շարունակում է պարտադրել իր միակողմանի տեսակետը»,- պարզաբանել է դիվանագետը։