Չորեքշաբթի երեկոյան Իսպանիայի մայրաքաղաք Մադրիդում անկարգություններ են սկսվել՝ Տոլեդո նահանգում գնացքների բախումից հետո։ Մոտ 1500 մարդ հավաքվել է Տրանսպորտի նախարարության շենքի մոտ՝ պահանջելով վարչապետ Պեդրո Սանչեսի կառավարության և տրանսպորտի նախարար Օսկար Պուենտեի հրաժարականը։ Ոստիկանությունը ցուցարարներին ցրելու համար արցունքաբեր գազ է կիրառել։

Ցուցարարները ողբերգության համար պատասխանատու են համարել իշխանություններին՝ մեղադրելով նրանց լուրջ թերացումների մեջ։ Ըստ RMF24-ի՝ ցույցում գերակշռել են ծայրահեղ աջ խմբավորումները։ Իսպանական TVE հեռուստաալիքը հայտնել է, որ ցուցարարները հրաժարվել են հեռանալ տարածքից, և նախարարության մոտ լարված իրավիճակը պահպանվել է մինչև ուշ գիշեր։

Չորեքշաբթի առավոտյան Տոլեդո նահանգի Ուրդա քաղաքում բախվել էին երկու արագընթաց գնացքներ։ Զոհվել է առնվազն 68 մարդ, ավելի քան 50-ը՝ վիրավորվել։ Զոհերի թվում է եղել Ֆատիմա Բանյեսը՝ աշխատանքի և սոցիալական ապահովության նախկին նախարարը, ով ներկայացրել է ընդդիմադիր «Ժողովրդական կուսակցությունը»։

Նախնական տվյալներով՝ պետական ​​«Renfe» ընկերությանը պատկանող գնացքին թույլատրվել է շարունակել ընթացքը՝ չնայած կարմիր ազդանշանին, որը զգուշացնում է գծի վրա մեկ այլ գնացքի առկայության մասին։ Տրանսպորտի նախարար Օսկար Պուենտեն միջադեպը որակել է որպես պրոտոկոլի «անբացատրելի» խախտում, որը տեղի է ունեցել տեղեկատվական համակարգի խափանման հետևանքով։ Նա ողբերգության հավանական պատճառ է նշել մարդկային գործոնը (սխալը)։