Թեհրանը չի բանակցում ԱՄՆ-ի հետ պատերազմը դադարեցնելու համար և «չի մտադիր» դա անել, ասել է Իրանի արտաքին գործերի նախարար Աբբաս Արաղչին, գրել է BBC-ը։

Աբբաս Արաղչիի մեկնաբանությունները հնչել են այն բանից հետո, երբ ԱՄՆ նախագահ Դոնալդ Թրամփի մամուլի քարտուղարը հայտարարել է, որ բանակցությունները «շարունակական» և «արդյունավետ» են։ Արաղչին նշել է, որ ԱՄՆ-ն գաղափարներ է ուղարկել այլ կողմերի միջոցով։

Իսրայելի «12-րդ ալիքի» հաղորդմամբ՝ պատերազմն ավարտելու համար Իրանը պետք է կատարի մի շարք պահանջներ։

Դրանք հիմնականում կենտրոնանում են պատերազմը սկսելու՝ ԱՄՆ պաշտոնյաների կողմից բերված հիմնական հիմնավորման վրա՝ կանխել երկրի միջուկային զենքի ստեղծումը, որի մասին տեղեկությունը չի հաստատվել, և որը Իրանը միշտ հերքել է, և վերացնել իր հրթիռային ծրագրի սպառնալիքը։

Առաջարկություններում պահանջվում է, որ Իրանը «պարտավորվի երբեք չմտադրվել միջուկային զենք ստեղծել», պարտավորվի ապամոնտաժել միջուկային օբյեկտները և իր ունեցած հարստացված ուրանի քանակը հանձնել Ատոմային էներգիայի միջազգային գործակալությանը։

Ըստ առաջարկությունների՝ Իրանը պետք է համաձայնվի սահմանափակել իր հրթիռային ծրագիրը՝ հեռահարության և քանակի առումով։ Իրանը պետք է դադարեցնի տարածաշրջանային «պրոքսիների»՝ Լիբանանում «Հըզբոլլահի», Գազայում «Համասի» և Եմենում «Հուսիթների» ֆինանսավորումը։

Իրանը նաև պարտավոր կլինի վերաբացել Հորմուզի նեղուցը, որպեսզի այն կարողանա գործել որպես «ազատ ծովային միջանցք»։ Նեղուցի փակումը, որի միջով անցնում է աշխարհի նավթի և գազի մատակարարումների մեկ հինգերորդ մասը, հանգեցրել է գների կտրուկ աճի և համաշխարհային տնտեսությունում անկման վախի։

Հաղորդված ծրագրում ասվում է, որ Իրանի նկատմամբ բոլոր միջազգային պատժամիջոցները կվերացվեն։

Բոլոր պատժամիջոցները վերականգնվել են անցյալ տարվա նոյեմբերին, այն բանից հետո, երբ Իրանը դադարեցրել է իր միջուկային օբյեկտների ստուգումները՝ Իսրայելի և ԱՄՆ-ի կողմից իր մի քանի միջուկային օբյեկտների և ռազմական բազաների ռմբակոծությունից հետո։

Այս մանրամասները հաստատելու հարցմանը Թրամփի մամուլի քարտուղարը պատասխանել է. «Սպիտակ տունը երբեք չի հաստատել այդ ամբողջական ծրագիրը։ Դրանում կան ճշմարտության տարրեր, բայց իմ կարդացած որոշ պատմություններ ամբողջովին իրական չէին»։

Իրանի արտաքին գործերի նախարարն ասել է, որ երկրի բարձրաստիճան ղեկավարներին առաջարկվել են «որոշ գաղափարներ», և «եթե անհրաժեշտ լինի դիրքորոշում ընդունել, այն անպայման կորոշվի»։