ՀՀ կառավարությունը կառավարությունն Իրավական ակտերի նախագծերի հրապարակման միասնական հարթակում (e-draft.am) հանրային քննարկման է ներկայացվել որոշման նախագիծ, որով առաջարկվում է ընդլայնել պետական ուսումնական հաստատությունների տրանսպորտային ծառայությունների դիմաց փոխհատուցման կարգը։

2025 թվականի օգոստոսի 28-ի N 1242-Ն որոշմամբ հաստատված է հանրակրթական պետական ուսումնական հաստատությունների մանկավարժական աշխատողներին և դպրոցահասակ երեխաներին տրանսպորտային ծառայությունների դիմաց փոխհատուցման կարգը։

Նախագծով առաջարկվում է տրանսպորտի փոխհատուցում տրամադրել նաև այն սովորողներին, ովքեր իրենց բնակավայրից դուրս՝ տարբեր բնակավայրեր սպասարկող նորակառույց հաստատություններում են սովորում։ Ըստ հիմնավորման՝ սա պայմանավորված է կառավարության «300-500 դպրոցների և մանկապարտեզների կառուցման, վերակառուցման և հիմնանորոգման» ծրագրով։ Այս ուսումնական հաստատությունները նախատեսված են սպասարկելու մի քանի բնակավայրերի սովորողների, ինչի հետևանքով որոշ երեխաներ կրթություն ստանալու համար հաճախում են իրենց բնակավայրից տարբերվող բնակավայրում գտնվող հաստատություններ։ 2026 թվականի հունիսի դրությամբ արդեն շահագործման է հանձնվել 29 հաստատություն, որոնք նախատեսված են նաև հարակից բնակավայրերի երեխաներին ծառայություններ մատուցելու, և մինչև տարեվերջ այս ցանկը էականորեն կավելանա։ Ըստ հիմնավորման՝ փոխադրման ծախսերի փոխհատուցման մեխանիզմի բացակայությունը կարող է ընտանիքների համար լրացուցիչ ֆինանսական բեռ դառնալ և ազդել կրթության մատչելիության վրա։

Նախատեսված որոշման  կարգի 3-րդ կետը լրացվում է նոր՝ 3-րդ ենթակետով, որի համաձայն՝ փոխհատուցման իրավունք են ստանում այն սովորողները, որոնք ուսումը ստանում են տարբեր բնակավայրեր սպասարկելու նպատակով կառուցված և իրենց փաստացի բնակության վայրում չգտնվող հաստատություններում։ Նման հաստատությունների ցանկը հաստատվում է պետական լիազորված մարմնի հրամանով։ 6-րդ կետը լրացվում է նոր՝ 5-րդ ենթակետով․ նշված սովորողների փոխհատուցման չափը սահմանվում է 2000 դրամ՝ հաշվարկված յուրաքանչյուր ներկա ստացած օրվա համար, սակայն այս սովորողների վրա չի տարածվում 6-րդ կետով սահմանված 20200 դրամի չափը։

Կարգի 17-րդ կետում կատարվում է լրացում, ըստ որի՝ 14-րդ կետի 3-րդ ենթակետում նշված Ձև 1-ը, 15-րդ կետում նշված Ձև 3-ը, Ձև 4-ը և Ձև 6-ը նոր ենթակետով նախատեսված սովորողների համար ներկայացվում են առանձին։

Հիմնավորման համաձայն՝ միջոցառման անհրաժեշտությունը բխում է ՀՀ կառավարության 2026 թվականի հունվարի 8-ի N 16-Լ որոշմամբ հաստատված, Հայաստանի տնտեսական և ինստիտուցիոնալ վերափոխման դոկտրինից, որի 36-րդ կետի 1-ին ենթակետով կրթությունը դիտվում է որպես նոր տնտեսական պարադիգմի առանցքային հիմք՝ «ռազմավարությունների ռազմավարություն»։

Նախագիծը ներկայացվել է ՀՀ կրթության, գիտության, մշակույթի և սպորտի նախարարության կողմից ու հանրային քննարկման է դրվել հունիսի 19-ից հուլիսի 10-ն ընկած ժամանակահատվածի համար։ Որոշումն ուժի մեջ կմտնի պաշտոնական հրապարակմանը հաջորդող օրվանից։ 

Տրանսպորտի փոխհատուցում կստանան նաև իրենց բնակության վայրից դուրս՝ տարբեր բնակավայրեր սպասարկող նորակառույց դպրոցներ հաճախող սովորողները՝ յուրաքանչյուր ներկա օրվա համար 2000 դրամի չափով, ինչը «միտված է նվազեցնելու ընտանիքների ֆինանսական բեռը և ապահովելու կրթության հավասար հասանելիություն»։