Այսօր՝ հունվարի 8-ին, մերկասառույցի պատճառով հերթական ավտովթարն է տեղի ունեցել Արագածոտնի մարզում։ Ժամը 18։10-ի սահմաններում Երևանի բնակիչ 45-ամյա Արտյոմ Մ․-ն իր վարած «Nissan» մակնիշի ավտոմեքենայով Երևան–Գյումրի ավտոճանապարհի Թալինի վարչական տարածքում դուրս է եկել երթևեկելի գոտուց, բախվել քարերի ձյունապատ հատվածներին և հայտնվել երթևեկելի գոտուց դուրս՝ ձորի մեջ։

Ինչպես դեպքի վայրից հայտնում է ֆոտոլրագրող Գագիկ Շամշյանը, օպերատիվորեն դեպքի վայր ժամանած Թալինի շտապօգնության բժիշկների հերթապահ խումբը տեղում օգնություն է ցուցաբերել վարորդին և ուղևորին, սակայն վերջիններս հրաժարվել են հիվանդանոց մեկնելուց։

Օպերատիվորեն ժամանել են ՀՀ Ներքին գործերի նախարարության փրկարար ծառայության Թալինի հրշեջ-փրկարարական ջոկատից 1 մարտական հաշվարկ։

Հրշեջ-փրկարարները հոսանքազրկել են ավտոմեքենան, փակել գազաբալոնի փականը, և մոտ մեկ ժամ տևած աշխատանքի արդյունքում ավտոմեքենան ձորից դուրս են բերել երթևեկելի գոտի։

Վթարի փաստով ՊԾ Արագածոտնի մարզի գումարտակում փաստաթղթեր են կազմվում։

Վարորդը տեղում ենթարկվել է սթափության փորձաքննության, եղել է սթափ։