ԱՄՆ նախագահ Դոնալդ Թրամփի պնդումը, որ Իրանը շուտով կունենա հրթիռ, որը կարող է հարվածել Միացյալ Նահանգներին, չի հաստատվում ԱՄՆ հետախուզական զեկույցներով ու չափազանցված է թվում, ինչը կասկածի տակ է դնում Իսլամական Հանրապետության վրա հնարավոր հարձակման նրա փաստարկի մի մասը, գրել է Reuters-ը՝ հղում անելով զեկույցներին ծանոթ երեք աղբյուրների։

Երեքշաբթի օրը Կոնգրեսին ուղղված իր «Երկրի վիճակի մասին» ելույթում Թրամփը սկսել էր ամերիկյան հանրությանը ներկայացնել իր փաստարկները, թե ինչու ԱՄՆ-ն կարող է հարվածներ հասցնել Իրանին։

Թրամփն ասել է, որ Թեհրանն «աշխատում է հրթիռների վրա, որոնք շուտով կհասնեն» Միացյալ Նահանգներ։

Սակայն, երկու աղբյուրների խոսքով, որևէ փոփոխություն չի եղել ԱՄՆ Պաշտպանության հետախուզական գործակալության 2025 թվականի չգաղտնիացված գնահատականում, որ Իրանին կարող է մինչև 2035 թվականը ժամանակ պահանջվել իր առկա արբանյակային տիեզերական արձակման սարքերից «ռազմական առումով կենսունակ միջմայրցամաքային բալիստիկ հրթիռ» (ICBM) մշակելու համար։

Մի աղբյուր նշել է, որ նույնիսկ եթե Չինաստանը կամ Հյուսիսային Կորեան, որոնք սերտորեն համագործակցում են Իրանի հետ, տեխնոլոգիական օգնություն ցուցաբերեն Իրանին, հավանաբար ամենավաղը մինչև ութ տարի կպահանջվի «ինչ-որ բան ստեղծելու համար, որը իրականում կհամապատասխանի միջմայրցամաքային բալիստիկ հրթիռի մակարդակին և կգործի»։