Դանիան նպատակ ունի Միացյալ Նահանգների հետ համագործակցությամբ խաղաղ լուծում գտնել Գրենլանդիայի ապագայի վերաբերյալ, ասել է երկրի վարչապետ Մետտե Ֆրեդերիկսենը։

Ըստ նրա՝ բանակցություններն արդեն իսկ դրական նախանշաններ են ցույց տալիս։

Դանիայի կառավարության ղեկավարն այս մասին հայտարարել է Ֆինլանդիայի Ռովանիեմի քաղաքում Եվրոպական արկտիկական գագաթնաժողովից հետո մամուլի ասուլիսին։

Ֆրեդերիկսենը նշել է, որ Գրենլանդիայի շուրջ ծավալված բուռն հանրային քննարկումներից հետո Դանիան, Գրենլանդիան և Միացյալ Նահանգները պայմանավորվել են ստեղծել բարձր մակարդակի համատեղ աշխատանքային խումբ։ Քանի որ խմբի աշխատանքները դեռ ընթացքի մեջ են, վաղ է խոսել վերջնական պայմանավորվածությունների մասին։

Վարչապետն ընդգծել է, որ կողմերն արդեն իսկ դրական տեղաշարժ են նկատում բանակցություններում, և հույս հայտնել, որ հետագայում հնարավոր կլինի հասնել խաղաղ լուծման։ «Մենք արդեն իսկ տեսնում ենք մի քանի շատ հստակ և դրական ազդանշան։ Ուստի հուսով եմ, որ ամերիկացիների հետ միասին կկարողանանք գտնել առաջ շարժվելու խաղաղ ուղի», - ասել է Ֆրեդերիկսենը։

Նա նաև ընդգծել է Արկտիկական տարածաշրջանի նկատմամբ ԵՄ-ի և ՆԱՏՕ-ի աճող ուշադրությունը։ Նա նշել է, որ թեև նախկինում Արկտիկան գրեթե տեղ չէր գտնում այդ կազմակերպությունների օրակարգերում, այժմ դաշինքի տասը անդամներ համատեղ զինվորական վարժանքներ են անցկացնում Գրենլանդիայում։