Գրենլանդիայում դանիական բանակը կենտրոնացած է Ռուսաստանի հնարավոր ակտիվությանը հակազդելու, այլ ոչ թե Միացյալ Նահանգների կողմից ռազմական սպառնալիքներից պաշտպանվելու վրա, «Reuters»-ին տված հարցազրույցում հայտարարել է Գրենլանդիայում Դանիայի Արկտիկական հրամանատարության ղեկավար, գեներալ-մայոր Սյորեն Անդերսենը։

«Իմ ուշադրությունը Միացյալ Նահանգների վրա չէ, ընդհանրապես։ Իմ ուշադրությունը Ռուսաստանի վրա է», - ասել է Անդերսենը։

Նա ասել է, որ Գրենլանդիայի մոտակայքում չինական կամ ռուսական նավեր չկան, չնայած նշել է, որ մեկ ռուսական հետազոտական ​​նավ 310 ծովային մղոն (574.12 կմ) հեռավորության վրա է։ «Դա ամենամոտն է», - ասել է զինվորականը՝ հավելելով, որ ՆԱՏՕ-ի դաշնակիցները «լավ պատկերացում ունեն այստեղի իրավիճակի մասին»։

Անդերսենի խոսքով՝ դաշնակիցները առաջիկա տարիներին ակնկալում են Ռուսաստանի ակտիվության աճ Գրենլանդիայի շուրջ։ «Մենք պետք է սկսենք պատրաստվել ու մեծացնել մեր ներկայությունը Արկտիկայում՝ ՆԱՏՕ-ի հյուսիսային սահմանը պաշտպանելու համար», - ընդգծել է Անդերսենը։