Ռուսական Սևծովյան նավատորմի «Ադմիրալ Գրիգորովիչ» նավը Լա Մանշում ուղեկցել է ռուսական նավթ տեղափոխող «Universal» և «Enigma» տանկերներին, չնայած Մեծ Բրիտանիայի վարչապետ Քեյր Սթարմերի՝ «ստվերային նավատորմի» տանկերները կալանավորելու խոստումին, հաղորդել է «The Telegraph» թերթը:

Սևծովյան նավատորմի կառավարվող հրթիռային ֆրեգատը ապրիլի 8-ի առավոտյան ուղեկցել է տանկերներին, որոնք Մեծ Բրիտանիայի հարավային ափի երկայնքով նավարկել են դեպի արևմուտք: Բրիտանական ռազմածովային ուժերի «RFA Tideforce» նավն անցել է դրանց կողքով:

Ըստ «The Telegraph»-ի՝ «Universal»-ը, որին սեպտեմբերին արգելվել էր մուտք գործել բրիտանական ջրեր՝ ռուսական հատուկ ռազմական գործողությունը ֆինանսավորելու իր դերի համար, հունվարի 18-ին լքել է ռուսական Վիսոցկի նավահանգիստը: «Enigma»-ն մարտի 29-ին լքել է Պրիմորսկի նավահանգիստը՝ նավարկելով Կամերունի դրոշի ներքո և ուղղություն վերցնելով դեպի Թուրքիա: Անցյալ տարվա մայիսին Մեծ Բրիտանիան պատժամիջոցներ է կիրառել տանկերի նկատմամբ՝ Կրեմլի եկամուտները ապահովելու իր դերի համար:

Վերլուծաբանների տվյալներով՝ հունվարից ի վեր Ռուսաստանի «ստվերային նավատորմի» ավելի քան 300 նավ է անցել Մեծ Բրիտանիայի տարածքային ջրերով։ Մարտի վերջին Լոնդոնը հայտարարել էր ռուսական էներգետիկ ռեսուրսների տեղափոխման հետ կապված պատժամիջոցների ներքո նավերի առգրավման մասին։