«Հրապարակ» թերթը գրում է․

Մայիսի 16-ին՝ Ուսանողների եւ երիտասարդների օրը, Հանրապետության հրապարակում տեղի կունենա DJ փառատոն, որի կազմակերպիչը կրկին «Դոմինո փրոդաքշնն» է։ Բեմում կլինի նաեւ Afrojack-ը։

Միջոցառման գլխավոր հովանավորը Կասկադի կառուցապատող Գրիգոր Տեր-Ղազարյանի «Ջի Թի Բի հոլդինգն» է, հովանավորների թվում է նաեւ Էվոկաբանկը, որի բաժնետոմսերի 100%-ին միանձնյա տիրապետում է Մարետա Գեւորկյանը։

Ի դեպ, ընտրությունների շեմին իշխանությունը տասնյակ մասշտաբային միջոցառումներ է կազմակերպում, հիմնականում համերգներ եւ տոնակատարություններ, եւ այս շարքը ձգվելու է մինչեւ հունիսի 7-ը։ Անգամ լռության ու ընտրության օրերին իշխանական թմբուկը չի լռելու՝ Գինու փառատոն են անելու։ Նպատակը պարզ է մարդկանց համար տեսարաններ ապահովել, որ գնան եւ ընտրեն իշխող ուժին, որն իրենց կյանքը տոնի է վերածել: Իսկ թե ինչ կլինի ընտրություններից հետո, հայ մարդը կսկսի մտածել հունիսի 7-ից հետո:

«Փաստ» օրաթերթը գրում է.

ՔՊ ղեկավար Նիկոլ Փաշինյանն այնքան անհանգստացած է առաջիկա ընտրություններում սպասվող պարտությամբ, որ կարգադրել է ամբողջ հանրապետությունը ողողել իր մեծադիր, փոքրադիր ու միջինադիր նկարներով՝ «ոչ մի պատ առանց Նիկոլ Փաշինյանի նկարի» սկզբունքով:

Դե, կուսկառույցներն ու պետական միավորներն էլ ինտենսիվ լծվել են այդ գործին, ընդ որում՝ կարևոր չհամարելով՝ կարելի է այդտեղ նկար փակցնել, թե չի կարելի, օրենքը թույլատրում է, թե չի թույլատրում: Առաջին «բլոկը», բնականաբար, նախընտրական շտաբներն են, որոնց պատերին կարող են ահռելի ցուցապաստառ փակցնել: Ի դեպ, մայրաքաղաքի որոշ հատվածներում մեկ փողոցի վրա «հաջողացրել» են նույնիսկ 2-3 շտաբ բացել: Ամբողջ օրվա ընթացքում այդ շտաբներ գրեթե մարդ չի մտնում, ավելին՝ անցնող-դարձողները ինչ ասես չեն ասում դրանց ուղղությամբ, բայց կարևորն այն է, որ Նիկոլ Փաշինյանի մեծ նկարը փակցված լինի ի տես բոլորի:

Քպականներն արդեն նույնիսկ համատիրությունների պատերին են փակցրել այդ նկարները՝ որոշ համատիրություններ անգամ դարձնելով «ոչ պաշտոնական» շտաբ: Զուգահեռ ՏԻՄ մարմինների առևտրի բաժինները ստիպում են հատկապես փոքր խանութների տերերին՝ իրենց խանութների պատերին փակցնել Նիկոլ Փաշինյանի նկարը՝ ակնարկելով մերժման դեպքում հնարավոր «անհարմարությունների» մասին: Ճիշտ է, արդյունքում, մեր տեղեկություններով, նման խանութների առևտուրը կտրուկ նվազել է, քանի որ մշտական հաճախորդների մեծ մասը հրաժարվում է մտնել այդ խանութներ, քանի դեռ ՔՊ ղեկավարի նկարը պատին է, բայց դա արդեն իշխանություններին չի հուզում, նրանք թքած ունեն բոլորի վրա: