ԱՄՆ պետքարտուղար Մարկո Ռուբիոն քայլեր է ձեռնարկել Պետդեպարտամենտի նկատմամբ վերահսկողությունը խստացնելու ուղղությամբ. գրել է Reuters-ը՝ վկայակոչելով իրավիճակին ծանոթ չորս աղբյուրների։

Վերջերս կայացած հանդիպման ժամանակ նա բարձրաստիճան պաշտոնյաներին հստակեցրել է, որ աշխատակիցները պետք է գործեն բացառապես իրենց լիազորությունների շրջանակում և խուսափեն այնպիսի գործողություններից, որոնք կարող են հանգեցնել շահերի բախման։

Ռուբիոյի այս ուղերձը հնչել է անցյալ շաբաթ՝ նախքան երեքշաբթի օրը Հանրապետական կուսակցության կրած ընտրական պարտությունները։ Այն համընկնում է կուսակցության առաջատար գործիչների՝ Թրամփի վարչակազմից (որի ժողովրդականությունը գնալով նվազում է) հեռավորություն պահպանելու փորձերի հետ։

Հանդիպումը տեղի է ունեցել Հունաստանում ԱՄՆ դեսպան Քիմբերլի Գիլֆոյլի՝ հոկտեմբերի կեսերին տեղի ունեցած աղմկահարույց հրաժարականից հետո։ Հրաժարականին նախորդել էին լրատվական հրապարակումներ, ըստ որոնց՝ նա գումարի, նվերների և այլ արտոնությունների դիմաց ապահովել է մուտք դեպի Թրամփի վարչակազմի պաշտոնյաներ։ Գիլֆոյլը հերքել է այդ տեղեկությունները՝ դրանք անվանելով կեղծ, և սոցիալական ցանցերում հայտարարել, որ պաշտպանելու է իր համբավը։

Աղբյուրներից մեկի փոխանցմամբ՝ հանդիպմանը, որին ներկա են եղել պետքարտուղարի մոտ երկու տասնյակ օգնականներից շատերը, Ռուբիոն զգուշացրել է, որ ոչ էթիկական վարքագիծը կհանգեցնի աշխատանքից ազատման՝ անկախ պաշտոնյայի ունեցած կապերից կամ ազդեցությունից։

Նա հավելել է, որ չափազանց շատ պաշտոնյաներ որոշումներ են կայացրել կամ առաջ են մղել քաղաքական օրակարգեր՝ առանց համակարգման, մինչդեռ կարևոր որոշումները պահանջում էին նրա կամ պետքարտուղարի տեղակալ Քրիստոֆեր Լանդաուի հաստատումը։ Այս մասին հայտնել են անանուն մնալու պայմանով խոսած անձինք։ Հանդիպման մանրամասները նախկինում չէին հրապարակվել։

Պետդեպարտամենտը հրաժարվել է մեկնաբանել հանդիպումը։

Հանդիպումից կարճ ժամանակ անց, ըստ երեք աղբյուրների, Պետդեպարտամենտի քաղաքականության գծով ղեկավար Ջերեմի Լյուինը ստիպված է եղել թողնել պաշտոնը։ Պատճառներից մեկն այն մտահոգությունն էր, որ նա զբաղվել է իր լիազորությունների շրջանակից դուրս գտնվող հարցերով՝ առանց պատշաճ համակարգման։ Այդ մտահոգությունների հստակ մանրամասները մնում են անհայտ։

Reuters-ի հետ զրուցած անձանցից ոչ ոք չի նշել, որ Լյուինի հեռանալը կապված է եղել էթիկական նորմերի խախտման որևէ դեպքի հետ։ Լյուինը կառավարությունում սկսել է աշխատել Իլոն Մասկի ղեկավարած «Կառավարական արդյունավետության դեպարտամենտի» (Department of Government Efficiency) շրջանակներում և մասնակցել է ԱՄՆ Միջազգային զարգացման գործակալության (USAID) կազմալուծմանը, որը վերահսկում էր ԱՄՆ-ի կողմից տրամադրվող արտաքին օգնությունը։

Ռուբիոն և Պետդեպարտամենտի ղեկավար կազմի այլ ներկայացուցիչներ դժգոհ էին նրա «ինքնագլուխ» գործելաոճից և «պետքարտուղարի որոշակի հրահանգներին» հակասող քայլերից, հայտնել է աղբյուրներից մեկը՝ առանց կոնկրետ օրինակներ բերելու։

Լյուինը, ով բարձր պաշտոնի էր նշանակվել ընդամենը երկու ամիս առաջ, անցյալ ամիս սոցիալական ցանցերում հայտնել էր, որ թողնում է պաշտոնը՝ մասնավոր հատված վերադառնալու նպատակով։

Մեկնաբանություն տալիս Պետդեպարտամենտի պաշտոնյան նշել է. «Փոխադարձ համաձայնությամբ որոշվեց, որ եկել է ժամանակը, որ նա (Լյուինը) առաջ շարժվի»։

Լյուինը Reuters-ին տված հայտարարության մեջ նշել է, որ իր հեռանալը ծրագրված է եղել հայտարարվելուց մի քանի շաբաթ առաջ, և հերքել է այն պնդումը, թե ինքը հեռացվել է աշխատանքից։ «Այն պնդումը, թե ես հեռացվել եմ աշխատանքից, սուտ է։ Ինչպես նախարարի և նրա թիմի հետ շաբաթներ շարունակ ծրագրված էր՝ ես, կարևոր նախագծերն ավարտելու համար նախատեսվածից ավելի երկար մնալուց հետո, միջանկյալ ընտրություններից առաջ հրաժարական տվեցի՝ մասնավոր հատվածում աշխատանքի անցնելու և իմ հարսանիքը կազմակերպելու նպատակով», - ասել է նա։ «Դա որևէ կապ չուներ գերատեսչության կառավարմանն առնչվող որևէ հանդիպման կամ քաղաքականության հետ»։

Ըստ մեկ այլ աղբյուրի՝ Ռուբիոյի դժգոհությունների պատճառներից է եղել նաև քաղաքական նշանակման աշխատակիցների կողմից արտասահմանյան չափազանց հաճախակի ուղևորությունները, ինչի արդյունքում սահմանվել է պահանջ, ըստ որի՝ Ռուբիոյի գրասենյակը պետք է հաստատի նման բոլոր ուղևորությունները։