Русский
Ֆրանսիայի նախագահ Էմմանուել Մակրոնը հեռախոսազրույցներ է ունեցել Թուրքիայի նախագահ Ռեջեփ Թայիփ Էրդողանի և Սաուդյան Արաբիայի թագաժառանգ Մուհամմեդ բին Սալմանի հետ։
«Նախ, մենք քննարկեցինք Մերձավոր և Միջին Արևելքում ստեղծված իրավիճակը. մենք կոչ արեցինք պահպանել հրադադարը և դրա իրականացումը Լիբանանում, պահպանել Հորմուզի նեղուցում նավարկության ազատությունը և ընդգծել ամուր, երկարատև դիվանագիտական լուծման անհրաժեշտությունը։
Մենք նաև անդրադարձանք Ուկրաինայում ստեղծված իրավիճակին և մեր համատեղ ջանքերին՝ Կամավորների կոալիցիայի շրջանակներում՝ արդար, երկարատև խաղաղության հաստատմանը նպաստելու համար։ Ես ընդգծեցի, որ այս խաղաղությունը պետք է բացարձակապես համապատասխանի Միավորված Ազգերի Կազմակերպության կանոնադրության սկզբունքներին և հիմնված լինի Ուկրաինայի համար ամուր անվտանգության երաշխիքների վրա։
Մասնավորապես, մայիսի 4-ին Երևանում կայանալիք Եվրոպական քաղաքական համայնքի գագաթնաժողովի տեսանկյունից, ես վերահաստատեցի Ֆրանսիայի աջակցությունը խաղաղության գործընթացին, որը կբերի բաց սահմանների և Հարավային Կովկասում տարածաշրջանային համագործակցության ամրապնդման վրա հիմնված նոր դարաշրջան։
Ի վերջո, մենք համաձայնեցինք մեր երկխոսությունը և երկկողմ համագործակցությունը շարունակաբար խորացնելու կարևորության վերաբերյալ»,- գրել է Մակրոնը Թուրքիայի նախագահի հետ խոսակցության մասին։
«Ես հենց նոր քննարկում ունեցա Սաուդյան Արաբիայի թագաժառանգ Մուհամմեդ բին Սալմանի հետ՝ Մերձավոր Արևելքում ստեղծված իրավիճակի վերաբերյալ։
Ես վերահաստատեցի իմ աջակցությունը հրադադարին, որը պետք է լիովին հարգվի և անհապաղ տարածվի Լիբանանի վրա։ Մենք քննարկեցինք Հորմուզի նեղուցում լիովին ազատ և անվտանգ նավարկությունը հնարավորինս արագ վերականգնելու անհրաժեշտությունը։
Քանի որ Իսլամաբադում քննարկումները նոր են սկսվել, մենք համաձայնեցինք սերտ կապի մեջ մնալ՝ նպաստելու լարվածության թուլացմանը, նավարկության ազատությանը և տարածաշրջանում երկարատև խաղաղություն և անվտանգություն ապահովելու համաձայնագրի կնքմանը»։