Ռուսաստանի արտաքին գործերի նախարարության մամուլի խոսնակ Մարիա Զախարովան հայտարարել է, որ Ռուսաստանին 2020 թվականի աշնանը ղարաբաղյան հակամարտության սուր փուլում անգործության մեջ մեղադրող ՀՀ Անվտանգության խորհրդի քարտուղար Ալեն Սիմոնյանի հայտարարությունները խեղաթյուրում են իրականությունը։ Այս մասին հայտնում է «Ինտերֆաքսը»։

«Մինչև Մոսկվա ժամանելը, Հայաստանի Անվտանգության խորհրդի քարտուղար Սիմոնյանը հայտարարել է, որ ռուսական կողմը, իբր, ոչինչ չի արել 2020 թվականի աշնանը՝ Լեռնային Ղարաբաղի հակամարտության սուր փուլում։ Խոսել Ռուսաստանի կողմից չձեռնարկված որոշ «արդյունավետ քայլերի» մասին, նշանակում է խեղաթյուրել ճշմարտությունը՝ միաժամանակ նվազեցնելով ռուս խաղաղապահների ջանքերն ու զոհաբերությունները, նշանակում է խեղաթյուրել ճշմարտությունը», - շաբաթ օրը լրագրողներին ասել է Զախարովան՝ մեկնաբանելով Ալեն Սիմոնյանի խոսքերը։

«Մենք չգիտենք, թե ում ոտքերի տակ է նա ընկել այդ ժամանակ, կամ գուցե նա շարունակում է ընկնել։ Բայց հենց Ռուսաստանն էր, և ոչ թե ուրիշ մեկը, որ կանգնեցրեց արյունահեղությունը տարածաշրջանում», - ավելացրել է նա։

Զախարովան հիշեցրել է, որ 2020 թվականի նոյեմբերի 10-ի գիշերը Ռուսաստանի, Ադրբեջանի և Հայաստանի առաջնորդներ Վլադիմիր Պուտինի, Նիկոլ Փաշինյանի և Իլհամ Ալիևի կողմից ստորագրված հայտարարությամբ՝ հայտարարվել էր լիակատար հրադադար և բոլոր ռազմական գործողությունները ղարաբաղյան հակամարտության գոտում։

«Սրանք «աբստրակտ քայլեր» չեն, այլ կոնկրետ, արդյունավետ միջոցառումներ, որոնց նախորդել են բազմաթիվ բարձր մակարդակի շփումներ: Արդյունքում, տարածաշրջան է տեղակայվել ռուսական խաղաղապահ զորախումբ: Մեր խաղաղապահները, որոնցից ոմանք իրենց կյանքի գնով, ապահովել են քաղաքացիական բնակչության անվտանգությունը, տրամադրել մարդասիրական օգնություն և իրականացրել ականազերծում», - հայտարարել է նա։ 

Նրա խոսքով, հենց 2021-2022 թվականներին հաջորդող եռակողմ բարձր մակարդակի մի շարք համաձայնագրերի հիման վրա է ստեղծվել հայ-ադրբեջանական հարաբերությունների կարգավորման «ճանապարհային քարտեզը», որը ներառում է Երևանի և Բաքվի միջև խաղաղության պայմանագրի մշակում, տրանսպորտային կապերի ապաշրջափակում, սահմանազատման գործընթացի մեկնարկ և մարդասիրական հարցերի լուծում։

«Ես ընդգծում եմ, որ այս բոլոր համաձայնագրերը մնում են ուժի մեջ. կողմերից ոչ մեկը չի հայտարարել դրանցից դուրս գալու մասին: Եվ այս պահին Բաքվի և Երևանի միջև խաղաղության գործընթացը, որոնք ներկայումս նախընտրում են անմիջականորեն աշխատել, առաջ է շարժվում, այդ թվում՝ ռուս միջնորդների առաջարկների հիման վրա», - հայտարարել է Զախարովան։

Ավելին, նա հիշեցրել է, որ 2022 թվականի հոկտեմբերին Պրահայում ԵՄ-ի կողմից հովանավորվող գագաթնաժողովում Փաշինյանը Լեռնային Ղարաբաղը ճանաչել է որպես Ադրբեջանի Հանրապետության տարածքի մաս։

Հիշեցնենք՝ Անվտանգության խորհրդի քարտուղար Ալեն Սիմոնյանը նոյեմբերի 7-ին «Համաշխարհային հայկական գագաթնաժողով 2026»-ի շրջանակում անդրադարձել է 2020 թվականի 44-օրյա պատերազմի ընթացքում Ռուսաստան կատարած իր այցին՝ նշելով. «Հարիֆ-հարիֆ մտածում էի, որ կարող եմ ինչ-որ բան փոխել, ընկել էի ոտքերը, խնդրում էի ասում էի՝ ձեր ախպերն ենք, դաշնակիցն ենք, կանգնեցրեք այս պատերազմը:

Իմ էշ խելքն ասա, որ այդ ժամանակ չէի հասկանում՝ ուր ես գնացել, ումից ինչ ես ուզում»։