2026 թվականի հոկտեմբերի 13-ին «Washington Post»-ի լրագրող Դեյվիդ Իգնատիուսը հայտնել էր, որ Միացյալ Նահանգները և մի շարք եվրոպական երկրներ համատեղ մշակում են Ուկրաինայում հակամարտության կարգավորման ծրագիր։

Նա ներկայացրել էր դրա հիմնական բաղադրիչները՝

- Ուկրաինայի հետպատերազմյան վերականգնում՝ Համաշխարհային բանկի աջակցությամբ,

- անվտանգության երաշխիքներ Կիեւի համար,

- տնտեսական մերձեցում ԵՄ-ի և Ռուսաստանի միջև (ներառյալ նավթի և գազի մատակարարումների վերսկսումը),

- հակամարտության սառեցում ներկայիս ռազմաճակատի գծի երկայնքով, 

- Ուկրաինայի կողմից Ռուսաստանի վերահսկողության ներքո տարածքների պաշտոնական ճանաչում։

Ուկրաինայի նախագահի խորհրդական Դմիտրի Լիտվինը հայտարարել է, որ «Washington Post»-ում նկարագրված ծրագիրն ամերիկյան առաջարկ է, որը ներկայացվել է Ֆլորիդայում ուկրաինական պատվիրակության հետ հանդիպման ժամանակ։ Նրա խոսքով՝ եվրոպական կողմերը համաձայն չեն եղել դրան։ Վաշինգտոնը չի մեկնաբանել Իգնատիուսի հրապարակումը, իսկ Կրեմլը հայտնել է, որ ծրագրի մասին տեղեկացել է միայն «Washington Post»-ի հոդվածից։

2022 թվականին հակամարտության սկզբից ի վեր մշակվել են խաղաղության մի շարք հնարավոր համաձայնագրեր։ Դրանցից առաջինն ի հայտ էր եկել Ստամբուլում բանակցությունների ժամանակ։ Գերագույն ռադայում «Ժողովրդի ծառա» խմբակցության ղեկավար Դավիդ Արախամիան ներկայացրել էր առաջարկի ընդհանուր բովանդակությունը, որը ներառում էր անվտանգության երաշխիքներ Ուկրաինայի համար և Կիևի պարտավորությունը՝ հրաժարվել ՆԱՏՕ-ին անդամակցելուց։

Բրազիլիան և Չինաստանը ներկայացրել էին կարգավորման իրենց ծրագրերը, իսկ Ինդոնեզիայից և Աֆրիկայից նույնպես խաղաղ նախաձեռնություններ էին եղել։ Վլադիմիր Զելենսկին առաջ էր քաշել իր «խաղաղության բանաձևը», մինչդեռ Վլադիմիր Պուտինը ներկայացրել էր հրադադարի պայմանները։

Անքորեջում Պուտինի և Դոնալդ Թրամփի հանդիպումից հետո Axios լրատվամիջոցը հայտնել էր 28 կետից բաղկացած խաղաղության ծրագրի մշակման մասին, որը բաժանված էր չորս հիմնական կատեգորիայի՝ խաղաղություն Ուկրաինայում, անվտանգության երաշխիքներ, անվտանգություն Եվրոպայում, նաև ԱՄՆ-ի, Ռուսաստանի և Ուկրաինայի միջև հետագա հարաբերություններ։

Փաստաթուղթը քննադատության էր արժանացել Կիեւի և մի շարք եվրոպական երկրների կողմից, ինչը հանգեցրել էր բազմաթիվ փոփոխությունների։ Մեկ տարի անց Ուկրաինայի իշխանությունները հայտարարել էին, որ հաջողվել է հեռանալ այն գաղափարներից, որոնք ի սկզբանե ներկայացվել էին Անքորեջում։ Վլադիմիր Պուտինը նշել էր, որ Մոսկվան համաձայնել է ամերիկյան կողմի առաջարկներին, թեև Կրեմլը երբեք չէր հաստատել՝ արդյոք խոսքը կոնկրետ Axios-ի հրապարակած ծրագրի մասին է։