Կարդինալ Պիետրո Պարոլինը, որը Հռոմի պապից հետո երկրորդ մարդն է համարվում, հորդորել է Միացյալ Նահանգներին թույլ տալ Վենեսուելայի նախկին առաջնորդ Նիկոլաս Մադուրոյին դեկտեմբերի վերջին ապաստան խնդրել Ռուսաստանում, հաղորդել է «The Washington Post»-ը:

«Մադուրոյին առաջարկվել է հեռանալ և վայելել իր փողերը: Այդ առաջարկի մի մասն այն է եղել, որ Պուտինը կապահովի նրա անվտանգությունը», - ասել է իրավիճակին ծանոթ աղբյուրը:

Պարոլինը Սուրբ Ծննդյան նախօրեին շտապ կանչել է Սուրբ Աթոռում ԱՄՆ դեսպան Բրայան Բիրչին՝ հարցնելու Վենեսուելայում Վաշինգտոնի ծրագրերի մանրամասները: Կառավարական փաստաթղթերին հղում անելով՝ հրատարակությունը հաղորդել է, որ ազդեցիկ իտալացի կարդինալը մի քանի օր փորձել է կապ հաստատել պետքարտուղար Մարկո Ռուբիոյի հետ՝ «հուսահատորեն ձգտելով կանխել արյունահեղությունը և անկայունությունը Վենեսուելայում»։

Նախագահ Դոնալդ Թրամփի դաշնակից Բիրչի հետ զրույցում Պարոլինը, ի թիվս այլ բաների, նշել է, որ Մոսկվան պատրաստ է Մադուրոյին ապաստան տրամադրել և «աղաչել է ամերիկացիներին համբերատար լինել», մինչև վենեսուելացի քաղաքական գործիչը համաձայնվի այս առաջարկին։

Վատիկանը ընդգծել է իր հիասթափությունը, որ «հրապարակվել են գաղտնի զրույցի հատվածներ, որոնք ճշգրիտ չեն արտացոլում Սուրբ Ծննդյան շրջանում տեղի ունեցած զրույցի բովանդակությունը»։ Բիրչի մամուլի քարտուղարը այս հարցի վերաբերյալ բոլոր հարցերը ուղղորդել է Պետդեպարտամենտին, որը հրաժարվել է մեկնաբանություն տալ։ Ըստ թերթի՝ ՌԴ նախագահ Վլադիմիր Պուտինի մամուլի քարտուղար Դմիտրի Պեսկովը չի արձագանքել հրատարակության մեկնաբանության հարցմանը։